Indoneziya poytaxti Jakarta shahri chekkasida joylashgan Bantargebang chiqindixonasida chiqindilar uyumi qulab tushishi oqibatida kamida yetti kishi halok bo‘ldi. Bu haqda “Reuters” xabar berdi.
Ma’lumotlarga ko‘ra, hodisa joriy yilning 8 mart kuni kuchli yomg‘irlar sabab yuz bergan. Oqibatda ulkan chiqindi uyumi qulab, hududda ishlayotgan odamlarni bosib qolgan.
Qutqaruvchilar vayronalar ostidan yettinchi qurbonning jasadini topgach, qidiruv-qutqaruv ishlari yakunlanganini bildirgan. Avval bedarak yo‘qolgan deb hisoblangan ikki kishi esa sog‘-salomat uylariga qaytgani aniqlangan.
Halok bo‘lganlar orasida yuk mashinasi haydovchilari hamda chiqindixona hududida faoliyat yuritgan kichik oziq-ovqat do‘konlari egalari ham bor.
Taxminan 110 gektar maydonni egallagan Bantargebang poligoni har kuni 6,5–7 ming tonnagacha chiqindi qabul qiladi va Indoneziyadagi eng yirik chiqindixonlardan biri hisoblanadi.
