Тошкент шаҳрида Давлат хавфсизлик хизмати ва Ички ишлар бош бошқармаси ходимлари томонидан ноқонуний криптоактивлар айланмаси билан шуғулланган гуруҳ фаолияти фош этилди.
Маълум қилинишича, ушбу гуруҳ ижтимоий тармоқларда сохта инвестиция платформасини реклама қилган. Рекламада давлат амалдорлари, машҳур шахслар ҳамда Президент образларидан фойдаланилиб, фуқароларни сармоя киритишга ишонтиришга уринилган.
Тергов маълумотларига кўра, гумонланувчилар томонидан амалга оширилган P2P операциялар ва криптовалюта ноқонуний айланмаси ҳажми 1,5 миллион АҚШ долларидан ошган.
Шунингдек, гуруҳ аъзолари 100 дан ортиқ Ўзбекистон фуқаросини алдаб Қозоғистонга олиб чиққан ва улар номига банк карталар очтириб, криптооперацияларда фойдаланган.
Тергов давомида ушбу жиноий схема ортида хорижлик фирибгарлар тургани, аммо асосий ижрочилар Ўзбекистон фуқаролари экани аниқланган.
Мазкур ҳолат бўйича Жиноят кодексининг 278-8-моддаси 3-қисми "а" банди билан жиноят иши қўзғатилган. Ушбу модда 3 йилдан 5 йилгача озодликдан маҳрум этиш жазосини назарда тутади.
Гумонланувчиларга нисбатан қамоқ эҳтиёт чораси қўлланилган, тергов ҳаракатлари давом этмоқда.
