Joriy yilning 12 avgust kuni osmonda kam uchraydigan astronomik hodisa — to'liq Quyosh tutilishi sodir bo'ladi. Bu vaqtda Oy Quyosh va Yer orasidan o'tib, Quyosh nurlarini to'liq to'sadi va ayrim hududlarda kunduzgi vaqt qisqa muddatga qorong'ulashadi.
Mutaxassislar ma'lumotiga ko'ra, to'liq Quyosh tutilishi Grenlandiya, Islandiya, Portugaliya hamda Ispaniyaning shimoliy qismida kuzatiladi. Yevropa, Afrika va Shimoliy Amerikaning katta qismi aholisi esa qisman Quyosh tutilishining guvohi bo'ladi.
Olimlarning ta'kidlashicha, tutilish yo'li taxminan 8,3 ming kilometrga cho'ziladi. Grenlandiyada to'liq tutilish ikki daqiqadan ortiq davom etsa, Ispaniyaning ayrim hududlarida bu jarayon bir necha o'n soniya davom etadi.
Mutaxassislar Quyoshga himoya vositalarisiz qarash xavfli ekanini eslatmoqda. Hodisani kuzatish uchun maxsus sertifikatlangan ko'zoynaklar yoki quyosh filtrlari bilan jihozlangan optik qurilmalardan foydalanish tavsiya etiladi.
Qayd etilishicha, ushbu noyob hodisa nafaqat osmon kuzatuvchilari, balki olimlar uchun ham muhim ahamiyatga ega bo'lib, Quyosh toji va Yer atmosferasidagi o'zgarishlarni o'rganish imkonini beradi.
