Жорий йилнинг 12 август куни осмонда кам учрайдиган астрономик ҳодиса — тўлиқ Қуёш тутилиши содир бўлади. Бу вақтда Ой Қуёш ва Ер орасидан ўтиб, Қуёш нурларини тўлиқ тўсади ва айрим ҳудудларда кундузги вақт қисқа муддатга қоронғулашади.
Мутахассислар маълумотига кўра, тўлиқ Қуёш тутилиши Гренландия, Исландия, Португалия ҳамда Испаниянинг шимолий қисмида кузатилади. Европа, Африка ва Шимолий Американинг катта қисми аҳолиси эса қисман Қуёш тутилишининг гувоҳи бўлади.
Олимларнинг таъкидлашича, тутилиш йўли тахминан 8,3 минг километрга чўзилади. Гренландияда тўлиқ тутилиш икки дақиқадан ортиқ давом этса, Испаниянинг айрим ҳудудларида бу жараён бир неча ўн сония давом этади.
Мутахассислар Қуёшга ҳимоя воситаларисиз қараш хавфли эканини эслатмоқда. Ҳодисани кузатиш учун махсус сертификатланган кўзойнаклар ёки қуёш фильтрлари билан жиҳозланган оптик қурилмалардан фойдаланиш тавсия этилади.
Қайд этилишича, ушбу ноёб ҳодиса нафақат осмон кузатувчилари, балки олимлар учун ҳам муҳим аҳамиятга эга бўлиб, Қуёш тожи ва Ер атмосферасидаги ўзгаришларни ўрганиш имконини беради.
