Samarqand viloyatining Qoʻshrabot tumanidagi 53-umumtaʼlim maktabida yuz bergan holat yuzasidan ayolga nisbatan maʼmuriy bayonnoma rasmiylashtirilib, ish sud organlariga yuborildi. Bu haqda “Zamon” informatsion dasturida xabar qilindi.
Maʼlum boʻlishicha, voqea 3 aprel kuni sodir boʻlgan. 1-sinf oʻquvchilari oʻzaro nizolashgani ortidan 6 aprel kuni kaltak yegan bolaning 45 yoshli onasi maktabga kelib, sinfda janjal koʻtargan va oʻgʻlini urgan sinfdoshlarini urgan.
Holat yuzasidan Qoʻshrabot tumani IIB tomonidan uch nafar voyaga yetmaganlarning ota-onalariga nisbatan Maʼmuriy javobgarlik toʻgʻrisidagi Kodeksning 47-moddasi asosida bayonnoma tuzilgan. Shuningdek, bolalarga nisbatan zoʻravonlik qilgan ayolga 52-modda (engil tan jarohati yetkazish) bilan maʼmuriy bayonnoma rasmiylashtirilib, ish sudga oshirilgan.
Ayol oʻz izohida qilgan ishidan afsusda ekanini bildirib, bunday holat boshqa takrorlanmasligini taʼkidlagan.
