Madaniyat vaziri Ozodbek Nazarbekov ijtimoiy tarmoqlarda ko‘payib borayotgan saviyasiz qo‘shiq va kliplar masalasiga munosabat bildirib, erkin jamiyat tanlovi mas’uliyatni ham talab qilishini ta’kidladi.
Uning aytishicha, san’at vakillarining yurish-turishini tartibga soluvchi alohida hujjat qabul qilish shart emas. Buning o‘rniga, “qora” loyihalarga sarflanayotgan mablag‘larni nazorat qilib, sifatli — “oq” kontentni ko‘proq qo‘llab-quvvatlash lozim. Vazir buni muammoning to‘g‘ri yechimi sifatida baholadi.
Shuningdek, Nazarbekov ochiq muloqot davomida soliq masalasiga ham to‘xtalib, soliq to‘lash har bir fuqaroning majburiyati ekanini eslatdi. Uning fikricha, bu masala muhokama qilinadigan mavzu emas — jamiyatdagi barcha qatlam vakillari, hatto aravakashlar ham soliq to‘laydi.
