O‘zbekistonda 2026 yil 1 apreldan boshlab avtomatlashtirilgan foto va video qayd etish tizimlari orqali aniqlangan qoidabuzarliklar uchun jarima ballarini hisoblash amaliyoti yo‘lga qo‘yildi.
Yo‘l harakati xavfsizligi xizmati ma’lumotlariga ko‘ra, 22 aprel holatiga kelib respublika bo‘yicha 22 638 nafar haydovchi 5 ballgacha jarima to‘plagan.
Qayd etilishicha, qoidabuzarliklar asosan svetoforning taqiqlovchi signaliga rioya qilmaslik, qarama-qarshi yo‘nalishga chiqish, to‘xtash va to‘xtab turish qoidalarini buzish hamda tezlikni oshirish holatlari bilan bog‘liq.
Rasmiy ma’lumotlarga ko‘ra, ayrim haydovchilar 22 kun ichida 10 ballgacha jarima to‘plagan. Amaldagi tartibga ko‘ra, 12 ballga etgan haydovchilar haydovchilik guvohnomasidan mahrum etilishi mumkin.
