Nashr hukumat hujjatlari asosida o‘tkazgan tahlilga ko‘ra, 2025 yilning dastlabki yetti oyida kamida 27 ming nafar bolaning ota-onasi qo‘lga olingan. Shu davrda AQSh Ichki xavfsizlik departamenti har oy o‘rtacha 1400 nafar ota-onani deportatsiya qilgan. Bu ko‘rsatkich 2024 yildagi Jo Bayden ma’muriyati davriga nisbatan qariyb ikki barobar yuqori bo‘lgan.
Ma’lumotlarga ko‘ra, hibsga olinganlar orasida kamida 12 ming nafar AQSh fuqarosi bo‘lgan bolalarning ota-onalari ham bor. Ayrim hollarda ota-onalar va bolalar turli davlat fuqarolari bo‘lgani sababli oilalarni birga saqlab qolish yanada mushkullashgan.
Nashr bir nechta muhojir oilalarining hikoyalarini ham keltirgan. Ulardan biri — Gaitidan borgan ayol bo‘lib, u siyosiy zo‘ravonliklardan qochib AQShga kelgan. Biroq hibsga olingach, u 13 oylik qizidan minglab kilometr uzoqda saqlangan. Ayolning aytishicha, qizaloq maxsus parhez va ona sutiga muhtoj bo‘lgan, ammo hukumat uni ozod qilishni rad etgan.
Huquq himoyachilari bu holatni oilalar ajratilishining yangi inqirozi deb baholamoqda. Ularning fikricha, hozirgi vaziyat Trampning birinchi prezidentlik davridagi mashhur “zero tolerance” siyosati davridan ham kengroq ko‘lamga chiqqan.
AQSh Ichki xavfsizlik departamenti esa oilalar ataylab ajratilganini rad etdi. Idora vakillari ota-onalarga farzandlari bilan birga deportatsiya qilinishi mumkinligi aytilishini ma’lum qildi.
