Нашр ҳукумат ҳужжатлари асосида ўтказган таҳлилга кўра, 2025 йилнинг дастлабки етти ойида камида 27 минг нафар боланинг ота-онаси қўлга олинган. Шу даврда АҚШ Ички хавфсизлик департаменти ҳар ой ўртача 1400 нафар ота-онани депортация қилган. Бу кўрсаткич 2024 йилдаги Жо Байден маъмурияти даврига нисбатан қарийб икки баробар юқори бўлган.
Маълумотларга кўра, ҳибсга олинганлар орасида камида 12 минг нафар АҚШ фуқароси бўлган болаларнинг ота-оналари ҳам бор. Айрим ҳолатларда ота-оналар ва болалар турли давлат фуқаролари бўлгани сабабли оилаларни бирга сақлаб қолиш янада мушкуллашган.
Нашр бир нечта муҳожир оилаларининг ҳикояларини ҳам келтирган. Улардан бири — Гаитидан борган аёл бўлиб, у сиёсий зўравонликлардан қочиб АҚШга келган. Бироқ ҳибсга олингач, у 13 ойлик қизидан минглаб километр узоқда сақланган. Аёлнинг айтишича, қизалоқ махсус парҳез ва она сутига муҳтож бўлган, аммо ҳукумат уни озод қилишни рад этган.
Ҳуқуқ ҳимоячилари бу ҳолатни оилалар ажратилишининг янги инқирози деб баҳоламоқда. Уларнинг фикрича, ҳозирги вазият Трампнинг биринчи президентлик давридаги машҳур “zero tolerance” сиёсати давридан ҳам кенгроқ кўламга чиққан.
АҚШ Ички хавфсизлик департаменти эса оилалар атайлаб ажратилганини рад этди. Идора вакиллари ота-оналарга фарзандлари билан бирга депортация қилиниши мумкинлиги айтилишини маълум қилди.
