Shahzoda Muhammedova va Muqaddas Sa`dullaeva:​ “Bir-birimizning nomimizni oqlamaguncha tinchimaymiz”

Musbat va manfiy. Loyihamizning galdagi ishtirokchilarini ana shunday ta`riflashni ma`qul topdim. Biri xushchaqchaq va shaddodgina bo`lsa, ikkinchisi uning aksi, og`ir-bosiq. Gap kim haqida borayotganiga qiziqayapsizmi? Unda «duet»chilarimizning fe`l-atvoriyu dunyoqarashlari yaqqol namoyon bo`lgan suhbatimizni o`qing.

– Suhbatni keskin savoldan boshlayotganimga ajablanmang. Yosh, kelishgan va bugungi kunda talabgir hisoblangan aktrisalarning do`stligi chinmi? Yoki bu ayrimlarniki kabi piarmi?

Shahzoda Muhammedova: – Piar?! Yo`g`ey, shunaqa do`stlashadiganlar ham bor ekanmi? Muqaddas bilan ko`p yillardan beri dugonamiz. Etti yil oldin «Poyqadam» filmining suratga olish jarayonida tanishganmiz. Ushbu kartinada Gulchehra Sa`dullaeva onamni ijro etgan. S`yomka vaqti Gulchehra opa qizlari haqida ko`p gapirib berardi va bir kuni «Ertaga Muqaddasni olib kelaman, tanishasizlar», degan. U paytlari Muqaddas san`at sohasidan yiroq, soddagina qizcha edi. Suratga olish maydonchasiga ham uyalibgina kirib kelgan.

Muqaddas Sa`dullaeva: – San`atkor bo`lishni xohlardim-u, lekin ota-onam ruxsat berishmagandi. «Men ham kinoda rol o`ynasam qaniydi», deya orzu qilardim. Suratga olish maydonchasiga kelganimda aktyor-aktrisalarni kuzatib, rosa havas qilganman. Shahzoda bilan tanishganimizdan keyin esa tezda chiqishib ketdik. Mana, bugungacha qadrdon dugonalarmiz.

Shaxzoda: – Muqaddas bilan tez-tez ko`rishib turamiz. Deyarli har kuni qo`ng`iroqlashamiz.

Muqaddas: – Ijtimoiy tarmoqlarga hamisha birga tushgan suratimizni joylaymiz. Agar bir kun surat qo`yilmasa, «Arazlashib qoldinglarmi, nechuk Shahzoda va Muqaddas birga emas» mazmunidagi savollar yog`iladi.

Shahzoda: – Ateleda ishlarim ko`payib ketsa, dugonamni «Kel bezaklarni tikishga qarashib yubor», deb yordamga chaqiraman. Ancha qo`li kelishib qolgan.

Muqaddas: – Dugonamga shogird tushib, tikuvchilikni o`rganmoqchiman. Liboslar bo`yicha dizayner bo`lishni ham rejalashtirayapman.

– Mana buni yangilik desa bo`ladi. Rostmi so`zingiz?

Muqaddas: – Ha!

Shahzoda: – Ikkimiz birgalikda liboslar kolleksiyasini yaratmoqchimiz. 30-40 ta libosdan tashkil topgan to`plam ustida fikr almashamiz, g`oyalarimizni o`rtoqlashamiz. Rejamiz amalga oshsa, san`atkorlar ishtirokida moda namoyishini o`tkazamiz.

– Qizlar, birgalikda bajarishni maqsad qilgan rejalaringizni bildik, xo`sh, xarakteringizda o`zaro uyg`unlik aynan nimalarda namoyon bo`ladi?

Muqaddas: – O`xshash taraflarimiz bor. Lekin biz ko`proq musbat va manfiymiz desam, to`g`ri bo`ladi. Shahzoda sho`x-shaddod, men esa aksincha, og`ir-bosiqman. Balki mana shu qarama-qarshi sifatlar ham munosabatlarimizni mustahkamlar.

Shahzoda: – Ikkimiz ham qizg`anchiqmiz, rashkimiz kuchli! Bir-birimiz uchun yaxshi suhbatdoshmiz.

Muqaddas: – Ishonuvchanligimizni ham ayt. Bu ikkimizda ham bor jihat...

Shaxzoda: – Dugonamning klip va filmlardagi rollarini ko`rib, u haqida salbiy fikr bildiradiganlar ham bo`ladi. Ana shunaqalar yo`limdan chiqsa bormi, to Muqaddasning nomini oqlamaguncha tinchimayman. Hatto, biror yaqin tanishim bo`lsa ham ayamayman. Dugonam ekranda salbiy obrazlarni ham ijro etadi. Lekin hayotda juda ko`ngilchan, sodda qiz. Ba`zan «Buncha bo`shashasan, dadilroq bo`l», deb urishib beraman.

Muqaddas: – Jim yurganim bilan dugonam haqida biror noo`rin gap eshitsam, sherga aylanaman.

Shahzoda: – Etti yildan beri biror marta ham xafalashib qolmaganmiz.

– Yo`g`ey?..

Shahzoda: – Ha, rost. Arazlashib, biror mavzuda kelisholmay qolgan paytlarimiz bo`lmagan. Dugonam bilan yana bir o`xshashligimiz bor: ikkimiz ham mashina boshqaramiz-u, lekin shaharni yaxshi bilmaymiz (kuladi).

– Biror yoqqa borishlaringiz kerak bo`lsa, nima qilasizlar?

Shahzoda: – Agar uzoqroq joyga boradigan bo`lsak, taksi to`xtatamiz-da, manzilni tushuntirib, uning ortidan ergashib ketaveramiz.

Muqaddas: – Etib borgach, haydovchi bilan hisob-kitob qilamiz-u, shu bahona yo`lni o`rganib olamiz.

– Bir-biriga qalqon bo`la oladigan dugonalar aktrisa sifatida raqobatlashadimi?

Muqaddas: – Yo`q, biz raqobatchi emasmiz! Bir voqeani aytaman, rejissyor Jahongir Ahmedovning «Baxt ortidan» filmida suratga tushishim kerak edi. S`yomka ishlari xorijda o`tkazilishi rejalashtirilgandi. Jo`nab ketish uchun hamma narsa taxt, samolyot chiptalari ham olingan paytda oyog`im sinib qoldi. Birgina meni deb hammasini bekor qilib bo`lmasdi-ku. Xullas, Jahongir aka Shahzodani chaqirib, «Dugonangizning o`rniga siz shu rolni o`ynang», debdi. U bo`lsa, «Bu o`rtog`imning roli, nega men ijro etishim kerak?» deb rad qilibdi. O`shanda Shahzodaning oqibatiga yana bir karra ishonchim ortgan. Jahongir aka ham «Haqiqiy do`st ekan, qoyil qoldim», degandi.

Shahzoda: – «Cho`loqlanib bo`lsa ham, Muqaddasni o`zi boradi», degandim. Chunki bu rejissyor bilan ishlashni u juda xohlagandi-da. Qolaversa, dugonamning yuzidan o`tib, bunday qilolmasdim.

Muqaddas: – Jahongir akaning o`zi aytmaganida, bu gaplardan xabarim ham yo`q edi.

– Tasavvur qiling, kinosinovga ikkingizni ham taklif etishdi. Tag`in bitta rolga. Ammo bu haqida ikkingiz ham bilmaysiz. Xo`sh, buyog`i nima bo`ladi?

Shahzoda: – Pavilonda uchrashib qolgudek bo`lsak, «Vo-o-oy seni ham chaqirishdimi?» deb ko`rishamiz-u, bir-birimizga omad tilab sinovda qatnashaveramiz.

Muqaddas: – Qay birimiz rolga tasdiqlansak ham, gina-qudrat bo`lmaydi.

– Ahilchiligingizga ko`z tegmasin-u, biroq atay o`rtangizga sovuqchilik solishni istaganlar ham topiladi-da.

Shahzoda: – Sekin aytasizmi, bunaqalar juda ko`p.

Muqaddas: – Lekin shu paytgacha kimdir yoki nimadir sabab bo`lib, urishib qolmaganmiz. Oxirigacha shunday bo`lsin! Men nazar-nafaslardan juda qo`rqaman. Ko`z tegishiga ham ishonaman. Har doim «Birovning yomon nazaridan o`zing asra», deb duo qilaman.

Shahzoda: – Men sizga nima degandim, dugonam juda samimiy va oqko`ngil qiz.

– Eng to`g`ri tanqidni faqat yaqin insoninggina ayta oladi, to`g`rimi? Keling, aktrisa sifatida bir-biringizning kamchiliklaringizni sanab o`tamiz. Kim boshlaydi?

Shahzoda: – Nechta aytish kerak?

– Shunchalik ko`pmi?

Shahzoda: – (kuladi) Yaxshi, Muqaddas sen boshla.

Muqaddas: – Bilmasam, dugonam ijodini mendan avval boshlagan. O`z muxlislariga ega aktrisa. Nimasini aytsam ekan.

– Siz o`ylab turing, ungacha Shahzodadan eshitamiz.

Shahzoda: – So`nggi paytlarda salbiy rollarni ko`p ijro etayapti. Garchi bu kamchilik hisoblanmasa-da, ko`proq ijobiy obrazlarni gavdalantirishini istardim. Odamlarimizni bilasiz-u, ekrandagi obrazni ko`rib, hayotda ham shunday ekan deb o`ylashadi. O`z ustida ishlasa, ijobiy qahramonlarni ham maromiga etkaza oladi.

Muqaddas: – Shahzoda, berilgan kino ssenariysining faqat o`ziga tegishli bo`lgan qismini o`qiydi-da, qolganiga e`tibor bermaydi. S`yomka kunlari belgilangachgina, ssenariyni to`liq o`qib chiqadi. Mana shu odatini to`g`irlasa, o`zi uchun foyda qilgan bo`ladi, nazarimda.

Shahzoda: – Vaqtim tig`iz bo`lgani uchun ham shunday qilaman-da, o`rtoq.

– Teatr va rassomchilik institutiga hujjat topshirmoqchi edinglar?..

Shahzoda: – Ha, shunday niyatimiz bo`lgandi. Ammo bu yil kech qoldik. Muqaddasning farzandi bor, men esa yangi atele va liboslar salonini ochdim, hozir faqat shular bilan bandman.

Muqaddas: – Aslida, bu yil birga hujjat topshirishni reja qilgandik. Ammo nasib qilmadi.

Shahzoda: – Buning ustiga, diplomimni ham yo`qotib qo`yganman. Benkov nomidagi dizayn va rassomchilik hamda Iqtisodiyot universitetini tamomlaganim haqidagi diplomlarim yo`q. Qaerga qo`yganman, sira aqlim etmayapti. Hujjatlarning dublikatini to`g`irlashga esa vaqt kerak. Shular ham rejamizga xalaqit berdi. Agar turmushga chiqib ketmasam, kelasi yil, albatta, o`qishga kiramiz.

– Oila qursangiz, o`qimaysizmi?

Shahzoda: – Ham oila, ham s`yomkalar, bir tarafda atele ishlari — qiynalib qolsam kerak, deb o`ylayapman.

– Professional aktrisa bo`lish uchun, albatta, o`qish kerak. Muhimi qobiliyati bo`lsin deyishadi-yu, ammo ustoz ko`rgan san`atkorlar hamisha bir pog`ona yuqorida turishadi.

Shahzoda: – Haqsiz! Albatta, o`qiymiz. Aktrisa bo`lishni astoydil niyat qilgandik, mana oz bo`lsa-da, orzumiz amalga oshdi. Vaholanki, ikkimizning oilamizdagilar ham bunga qarshi bo`lishgan. Demak, hali hammasi oldinda.

Muqaddas: – Dadam tanlovimga qarshi edi. Hozir esa o`qishimga rozi.

Muqaddas, samarali ijod qilayapsiz, ketma-ket rollar, kliplar... Ishingizdan ko`nglingiz to`layaptimi?

Muqaddas: – Rostini aytsam, yo`q! Yuragim jiz etgan rol bo`lmadi hali. Ilgarilari ssenariy berishsa, tezroq tanilishim kerak, deb ijro qilaverardim. Onam «Unday qilma, avval tanishib chiq», deb ko`p gapirgan. Ammo quloq solmasdim. Ishtirok etgan bir-ikkita filmlarimni tomosha qilganimdan so`ng onam to`g`ri aytgan ekan deb, uyalib qoldim. Hozir har bir ssenariyni yaxshilab o`qiyman. Rollarga ham jiddiy yondashayapman.

– Shahzoda sizni ijodingizda nima yangiliklar? Oxirgi paytlarda kamnamosiz?

Shahzoda: – Filmlarda suratga tushmayapman. Asosan dizaynerlik ishim bilan bandman. Negadir, kinodan zerikdim. Balki ketma-ket rol ijro qilganim uchunmi yoki yaxshi ssenariy bo`lmayotganigami, qanday qilib tushuntirishni bilmayapman. Ehtimol, yangi ish boshlaganimgami, xayolimda liboslar eskizi, turli-tuman g`oyalar... Ammo kino ko`rinmayapti.

Muqaddas: – Ikkita ateleni boshqarish oson emas. Menimcha, kinodagi biror taklifni qabul qilsang, s`yomka ishlariga chalg`ib qolishingdan cho`chiyapsan.

Shahzoda: – Menimcha ham shunday. Atelega kelgan har bir mijoz bilan shaxsan o`zim suhbatlashaman. Didiga mos qilib libos eskizini chizamiz. Qolaversa, ishchilarni ham nazorat qilib turish kerak.

– Mijozlaringizni o`ylayapsiz-u, ammo muxlislaringiz-chi?

Shahzoda: – Ozgina tanaffus qilsam, muxlislarim meni tushunishadi, deb o`ylayman. Yaqinda ham ikkita serialdan taklif tushdi. Ammo rozi bo`lmadim. Chunki serialning suratga olish ishlari yarim yildan ko`proq vaqtni egallaydi. Ayni dam bunga imkoniyatim yo`q.

– Takliflarni rad qilaversangiz...

Shahzoda: – Chaqirmay qo`yishlari mumkin demoqchisiz-da? Ishlarimni yo`lga qo`yib olay, yana kinoga qaytaman.

– Atrofingizda gap-so`zlar haqida so`rasam?..

Muqaddas: – Dedi-dedilar tinch yashashga xalaqit beradi. Ammo na iloj, aktrisalarning hech biri gap-so`zlardan xoli emas. Bunday munosabatga ota-onam ham ko`p yillar davomida sabr qilib kelishgan. Ulardan o`rnak olib, men ham og`ir-bosiqlik bilan yondashishni o`rganayapman.

Shahzoda: – Lekin Gulchehra opa bilan Sa`dulla akaning yoshligida internet, turli xil ijtimoiy saytlar bo`lmaganda.

Muqaddas: – To`g`ri aytasan. Bular ham ig`voning tarqalishiga hissa qo`shayapti. Avvallari san`atkor bo`lsam, chiroyli kiyinib, suratga tushib, muxlislarimga dasxat ulashaman, deb shirin xayollarga berilarkanman. San`atning ichiga kirgach, tasavvurim o`zgardi. Ammo ortga yo`l yo`q!

– Xonandalikda ham o`zingizni sinab ko`rdingiz. To`y xizmatlariga ham chiqayotgandingiz. Nega ijodingiz to`xtab qoldi? Yo raqobat cho`chitdimi?

Shahzoda: – Kichikligimdan xonanda bo`lishni orzu qilardim. Aktrisalik umuman xayolimga kelmagan. Bir-ikkita rollarni ijro etgach, konservatoriyaga kiraman, qo`shiq kuylayman dedim. Ammo atrofimdagi turli gap-so`zlar meni chalg`itdi. Avval aktrisa sifatida tanilib, keyin xonandalikni boshlaganimga juda afsuslanaman.

Muqaddas: – Qo`shiq aytishni juda yoqtiradi. Yo`l-yo`lakay biror ashulani xirgoyi qilishini aytmaysizmi?

Shahzoda: – Uy yumushlarini bajarayotib qo`shiq kuylaganimda ham o`zimni sahnada turgandek his qilardim. Katta orzum edi-da bu! Ammo hozircha xonandalik faoliyatimni to`xtatib turibman. Shu kungacha o`ntacha qo`shiq yozdim, uchtasiga klip suratga olindi. Bir tarafdan moliyaviy masalalarda ham qo`lim salgina kaltalik qildi. Shou-biznesda o`rnimni topaman desangiz, yo ijodingizga pul tikadigan otangiz, yo baquvvat «homiy»ingiz, yoki shartnoma asosida ishlashni taklif qiladigan kompaniyalar bilan kelishishingizga to`g`ri keladi. Menda puldor «homiy» yo`q. Otam yoshligimda vafot etgan, shartnoma bilan ishlashni esa qabul qilolmayman. Otam rahmatli asos solgan biznesni rivojlantirib, bugun o`z kunimni ko`rayapman. Biror kompaniya bilan kelishuv imzolasam, shak-shubhasiz uning yo`rig`iga yurishim, aytganini qilishim kerak. Kimnidir menga buyruq berishini esa ko`tarolmayman.

– Qizlar, mazmunli suhbatingiz uchun rahmat! Ijodingizga rivoj tilaymiz!

Blis: Muqaddas haqida

– Ishni sekin bajaradi, har doim kech qoladi, ishonuvchan — qaysi ta`rif dugonangizga mos?

– Kechikib yuradi.

– O`ziga nisbatan nohaqlik qilinayotganini sezsa, qanday javob qaytaradi?

– Yig`laydi.

– Uni tavakkalchi deyolamizmi?

– Yo`q, tavakkal qilishdan qo`rqadi.

– Uchtasidan qay birini Muqaddas bajara oladi, sizningcha, rep yo`nalishida kuylash, tanovor raqsini ijro etish yoki balet tushish?

– Tanovorga raqs tusholsa kerak.

Blis: Shahzoda haqida

– Sirini kimgadir ishonib pand eganmi?

– Bo`lib turadi.

– So`nggi bor qachon ko`zyosh to`kkanini ko`rdingiz?

– Bugun. Intervyuga kelayotganimizda yig`lab oldi.

– Kinoda qaysi rolini ijro etishga qiynalgan?

– Xabarim yo`q ekan, menimcha hech birida qiynalmaydi.

– Tasavvur qiling, moddiy tarafdan qiyin vaziyatga tushib qoldi. Qarshisida tikuvchilikdan tashqari yana uchta yo`l bor, u qay birini tanlaydi? Ingliz tilida repititorlik qilish, pishiriq tayyorlab sotish, kliplarga suratga tushish.

Shahzoda: – O`zim javob beray, pishiriq tayyorlab sotaman. Shirinliklarni tayyorlashga qiziqaman.

Dildora YuSUFBEKOVA tayyorladi.