Ispaniyaning “Barselona” jamoasi sobiq himoyachisi Juliano Belletti klubning rasmiy elchisiga aylandi. Braziliyalik sobiq futbolchi yaqin yillarda “Barselona” nomidan turli tadbirlarda ishtirok etadi.
“Men uchun jahondagi eng yaxshi jamoaning bir a`zosi bo`lish sharafdir. Men “Barselona” klubi brendini jahon bo`ylab reklama qilaman va bu shunchaki, oddiy jamoa emasligini namoyosh etaman”, – dedi Belletti.
Ma`lumot uchun, 41 yoshli himoyachi 2004-2007 yillarda “Barselona” safida to`p surgan va ikki bor La ligada g`olib chiqib, ikki bor Ispaniya Superkubogini qo`lga kiritgan. Bundan tashqari 2006 yilgi Evropa Chempionlar ligasida ham zafar quchgan.
