Namangan shahri hokimi "Navbahor" futbol klubi prezidenti etib tayinlandi

13 iyul kuni "Navbahor" klubi rahbariyati, murabbiylar shtabi va futbolchilar Namangan viloyat hokimi qabulida bo`lishdi. Namangan viloyat hokimligining kichik majlislar zalida tashkil etilgan marosimda jamoa a`zolaridan tashqari viloyatdagi homiy tashkilot rahbarlari ham ishtirok etishdi. Bu haqda "Navbahor" klubi matbuot xizmati xabar bermoqda.

Marosim avvalida so`z olgan O`zbekiston Respublikasi Oliy Majlis Senati a`zosi, Namangan viloyat hokimi, viloyat futbol federasiyasi prezidenti Xayrulla Hayitboevich Bozarov so`z oldi. Viloyat hokimi yig`ilishdan asosiy maqsad "Navbahor" futbol klubiga yangi prezident tayinlash va ikkinchi davrani munosib tarzda o`tkazishni ta`minlashdan iborat ekanligini bildirdi. Bozarov yaqinda Namangan shahar hokimi sifatida ish boshlagan Shavkatjon Shokirdjanovich Abdurazzoqovni klub prezidenti sifatida yig`ilganlarga tanishtirdi. Viloyat hokimi klub prezidentining faoliyatini muvaffaqiyatli chiqishi bilan bir qatorda faoliyatiga omad tiladi.

So`zga chiqqan klub prezidenti Shavkatjon Abdurazzaqov birgalikda "Navbahor" jamoasini yuksak o`rinlarga olib chiqishdan umidvorligini bildirdi. Shuningdek, notiq o`z so`zida millionlar o`yiniga befarq emasligini, yoshlik chog`ida futbol bilan shug`ullanganligini aytib, jamoa ravnaqi va muxlislarni hursand qilish uchun hamjihatlikda ish olib borilishini ta`kidladi.

Shundan so`ng jamoa bosh murabbiyi Ilhom Mo`minjonov so`zga chiqib, jamoaning birinchi davradagi ishtiroki haqida so`z yuritib, ikkinchi davraga olib borilayotgan tayyorgarlik jarayoni haqida axborot berdi. Mo`minjonov ikkinchi davrani munosib tarzda o`tkazib jamoa muxlislarini hursand qilish asosiy maqsad ekanligini bildirdi. Aynan shu maqsadda tarkibga Abbos Maxstaliev, Doniyor Usmonov, Murod Rajabov va Mirzohid Mamatxanovlarni taklif etilganligini aytib, futbolchilarni yig`ilganlarga tanishtirdi. O`z navbatida murabbiy tarkibga yangi o`yinchilarni jalb etish borasida muzokaralar davom etayotganligini qo`shimcha qildi.

Bosh murabbiyning so`zlarini tinglagan viloyat hokimi jamoaga mahoratli hujumchi jalb etish kerakligini uqtirdi. Murabbiy bunga javoban bu borada ham muzokaralar davom etayotganligini aytib, birinchi davrani jarohat tufayli to`liq o`tkaza olmagan Ro`zimboy Ahmedovni safga qaytganligi sababli jamoada olib qolganligini bildirdi.

Viloyat hokimi Xayrulla Bozarov jamoaning birinchi davradagi ishtiroki haqida o`z fikrlari bilan o`rtoqlashdi:

- Maydonda futbolchilar chiroyli va mazmunli o`yin namoyish etishlari lozim. Raqib darvozasiga bitta gol urib, yutuqni ushlab qolish maqsadida harakat qilishni noto`g`ri deb o`ylayman. Chiroyli o`yin namoyish qilib taktik usullarni qo`llab g`alaba sari intilish o`yingohni to`ldirib o`tirgan muxlislarga quvonch baxsh etadi. Shundan kelib chiqqan holda yutuq uchun mazmunli o`yin orqali intilish kerak. Birinchi davrada jamoaning urgan gollari soni ancha kam bo`ldi. Kombinasion xatti-harakatlar orqali nafaqat gollar sonini balki yutuqlarni ham oshirish mumkin. Tajribali futbolchilar maydonda etakchilikni qo`lga olib jamoani munosib tarzda to`p surishini ta`minlashi lozim. Oldingi yillarda jamoaga bo`lgan e`tibor u qadar kuchli bo`lmagandi. Bu yildan vaziyat o`zgardi. Homiylarimiz "Navbahor"ni chempionatda munosib ishtirok etishi uchun yordam berib kelishmoqda. Buning uchun homiylarimizga katta rahmat. Futbolda moddiy ta`minot muhim sanaladi. Doimiy ravishda jamoalar moddiy tomondan qo`llab-quvvatlangan. O`zbek futboliga ham xorijiy investorlarni kirib kelayotganligiga guvoh bo`lmoqdamiz. Vaqti kelib "Navbahor"ga ham xorijdan homiylar topilar. "Navbahor" xalq jamoasi, shunday ekan hozircha mahalliy homiylar ko`magida jamoani ko`tarishga harakat qilamiz. Bunga javoban futbolchilar maydonda munosib o`yin ko`rsatib bildirilgan ishonchni oqlashlari kerak. Ikkinchi davrada "Navbahor"ga omad yor bo`lsin, - deya Bozarov o`z so`zini yakunladi.

Yig`ilish so`nggida futbolchilar nomidan Dilshod Jabborov yaratib berilayotgan shart-sharoitlar va bildirilgan ishonch uchun minnatdorchilik bildirib, ikkinchi davrada rahbariyat va muxlislar ishonchini oqlash uchun astoydil harakat qilishlarini aytib o`tdi.

Samimiy ruhda o`tgan yig`ilish shu asnoda yakunlandi.