Bugun 7 dekabr kuni Toshkent shahri Sergeli tumanida joylashgan Korzinka.uz supermarketi avtomobil to`xtash joyida VAZ rusumli avtomobil yonib ketdi.
"VAZ mashinasining egasi avtomobilni to`xtash joyida qoldirib, supermarketga kirib ketgan, shu payt, mashina saloni tutunga to`la boshlagan, deya xabar beradi uz24.uz.
Supermarket havfsizlik xizmati xodimlari darhol o`t o`chirish xizmatiga qo`ng`iroq qilib, ular kelgunga qadar o`zlari o`tni o`chirishni boshlaganlar.
O`t o`chirish brigadasi sanoqli daqiqalarda etib keldi va tez orada yong`in bartaraf etildi.
“Hodisa oqibatida jabrlanganlar yo`q"- deydi guvohlardan biri.
Ma`lumotlarga ko`ra, yong`in chiqqan avtomobilga gaz ballon o`rnatilgan bo`lgan. Tezkor harakat natijasida gaz ballonga shikast etmagan va portlash yuz bermagan.
Hozirda yong`in sabablari o`rganilmoqda. Dastlabki taxminlarga ko`ra, bunga avtomobil elektr simlaridagi qisqa tutashuv sabab bo`lgan.