O`zbekiston ilm-fani og`ir judolikka uchradi. Bioorganik kimyo sohasidagi yirik olim, kimyo fanlari doktori, akademik Abduvali Abduvahobov 73 yoshida vafot etdi.
A.Abduvahobov 1941 yili Toshkent shahrida ishchi oilasida tug`ildi. 1965 yilda Toshkent davlat universiteti (hozirgi O`zbekiston Milliy universiteti)ni tugatib, ushbu universitet aspiranturasida tahsil oldi, dastlab nomzodlik, so`ngra doktorlik dissertasiyasini himoya qildi. 1995 yilda O`zbekiston Fanlar akademiyasining a`zosi etib saylandi.
Iste`dodli olim o`zining qariyb 50 yillik ilmiy faoliyati davomida O`zbekiston Fanlar akademiyasining Bioorganik kimyo instituti laboratoriya mudiri, institut direktori, Fanlar akademiyasining Kimyo texnologiyasi bo`limi raisi, akademiya vise-prezidenti kabi mas`ul lavozimlarda samarali mehnat qildi va kimyo sohasining dolzarb masalalarini tadqiq etish, yuqori malakali kadrlar tayyorlash ishiga munosib hissa qo`shdi.
Taniqli olimning kimyo fanining nazariy va amaliy masalalariga bag`ishlangan dolzarb mavzudagi maqola va risolalari, ilmiy ishlanma va ixtirolari keng jamoatchilikka yaxshi ma`lum.
Jonkuyar ustoz sifatida ko`plab yoshlarga ilm-fan sirlaridan saboq bergan zahmatkash olimning bevosita rahbarligida o`nlab fan doktorlari va fan nomzodlari tayyorlandi.
Atoqli olim, mehribon ustoz, kamtarin inson Abduvali Abduvahobovning xotirasi qalblarimizda hamisha saqlanib qoladi.
I.Karimov, I.Sobirov, D.Toshmuhamedova,
Sh.Mirziyoev, Sh.Solihov
