Xitoy samolyoti yo`qolgan Boeing’ga tegishli bo`lishi mumkin bo`lgan bo`laklarni topdi. “Sinxua” axborot agentligining xabar qilishicha, Malaysia Airlines laynerining qidiruv ishlarida qatnashayotgan Xitoyning Il-76 samolyoti ekipaji shubhali jismlarni topgan. Qolgan ma`lumotlar hozircha oshkor etilmayapti.
O`tgan haftada Avstraliya dengiz kemalari harakat xavfsizligi boshqarmasi (AMSA) Malaysia Airlines aviakompaniyasining yo`qolgan Boeing 777-200 samolyotiga tegishli bo`lishi tahmin qilingan, Pert (Avstraliya) shahridan 2,5 ming km uzoqlikda suzib yurgan ikkita bo`lak topgani haqida ma`lum qilganidan edi. Shundan so`ng qidiruv ishlarida qatnashayotgan deyarli barcha samolyot va kemalar Hind okeanining janubiy qismiga yuborilmoqda.
Bundan tashqari AQSh havo-dengiz kuchlari yuqori texnologiyali Towed Pinger Locator ovozli lokatorini yuqorida ko`rsatilgan joyga yuborgan. Bu qurilma samolyot bortidagi o`ziyozar mexanizmni aniqlashga yordam beradi.
Eslatib o`tamiz, 8 mart kuni Malayziya aviakompaniyasiga qarashli bo`lgan samolyot parvozga chiqqanidan ikki soat o`tgach, sirli tarzda g`oyib bo`lgan. Boeing bortida 14 mamlakatdan 239 kishi bo`lgan. Ayni damda laynerning qidiruv ishlarida 26 ta mamlakat ishtirok etmoqda.