Facebook’dagi «Jizzaxliklar hamjamiyati» guruhiga ijtimoiy tarmoq foydalanuvchilar tomonidan Hamid Olimjon va Zulfiyaxonim haykalining nurayotgani aks etgan suratlar joylashtirildi. Suratlar ostidagi izohlarda esa foydalanuvchilar mazkur holat achinarli ekanligini, shoshma-shosharlik bilan bunyod etilgan haykallarga sifatli materiallar ishlatilmaganligini ta`kidlagan, deb xabar berdi «Sangzor.uz».
Mazkur yodgorlik tantanali tarzda o`tgan yilning noyabr oyi boshida ochilgan edi. Hali ikki oy o`tmasdan sifatsiz ashyolardan shoshma-shosharlik bilan yasalgan haykallar nurab tushayotgani esa achinarlidir.
O`zbekiston Respublikasi Prezidenti Shavkat Mirziyoevning tavsiyasiga binoan amalga oshirilgan mazkur yodgorlikni bunyod etish ishlari aprel oyida uning viloyatga tashrifidan so`ng boshlangan edi. Juda ham qisqa muddatda amalga oshirilgan ishlar natijasida anchagina qarovsiz holga kelib qolgan hiyobon hududi tanib bo`lmas darajada o`zgardi. Quruvchilarning say`i-harakati natijasida noyabr oyida ushbu hududda nafaqat haykal o`rnatildi, balki Xo`ja Nuriddin madrasasi rekonstruksiya qilinib xalqimizning ikki buyuk ijodkorlari H.Olimjon va Zulfiya muzeylari, unga tutash binoda esa davlat va jamoat arbobi Sharof Rashidov muzeylari ish boshladi.
Oradan ko`p o`tmasdan Hamid Olimjon va Zulfiyaxonimga atab bunyod etilgan haykallar mana bunday ko`rinishga kelib qoldi.
Istardikki mazkur holat tez orada mutasaddi tashkilotlar tomonidan bartaraf etiladi. Haykallar sifatli materiallar bilan qaytadan ta`mirlanib, avvalgiday boqqa tashrif buyuradigan she`riyat va adabiyot ixlosmandlariga zavq va ilhom bag`ishlaydi.
