Hindiston G`arbiy Bengaliya shtatining polisiyasi ikki aka-ukani qo`lga oldi. Ulardan biri aldov yo`li bilan xotinining buyragini sotib yuborgan, deb xabar berdi Lenta.ru nashri.
Barchasi ayolning haqiqatni bilib qolib polisiyaga xabar bergandan so`ng ro`y berdi.
Jabrlanuvchi 28 yoshli Rita Sarkarning bayon qilishicha, ikki yil oldin oshqozonida og`riq paydo bo`lgach, eri Kalkuttadagi xususiy davolash markaziga olib boradi. Shifokor esa darhol jarohlik amaliyotini o`tkazib, “Endi xavotir olmasangiz ham bo`ladi, yallig`langan “ko`richak”ni olib tashladik”, deya ayolni tinchlantirgan.
“Shundan so`ng ham og`riq to`xtamadi. Hattoki, undan ham battarlashdi. Erim esa jarrohlik haqida boshqa birovga gapirishimni taqiqlab, shifokorga ham uchrashishimga yo`l qo`ymadi”, dedi Rita Sarkar.
Uch oy oldin ayolning oshqozonida yana og`riq boshlanganda ota-onasi nima bo`lganligini aniqlash uchun shifokor ko`rigiga olib boradi. Tibbiy tekshiruv natijasida Ritaning o`ng buyragi yo`qligi aniqlangan.
Shundan so`ng ular ayolning eri Basvajita, qayinukasi va qaynonasining ustidan arz qilib polisiyaga murojaat qilishadi. Aka-ukalar 5 fevral kuni qo`lga olinadi. Qaynona esa yashirinishga ulgurgan.
Tergov jarayonida buyrak boy tadbirkorga sotilgani aniqlandi.
Rita Sarkarning aytishicha, erining qarindoshlari 12 yillik turmush davomida arzimagan sabablarga ham ayolni haqoratlab, kamsitib kelishgan.
