AsosiyDunyo

O`zbekiston va Qozog`iston yagona axborot maydoni yaratishni rejalashtirmoqda

'O`zbekiston va Qozog`iston yagona axborot maydoni yaratishni rejalashtirmoqda'ning rasmi

O`zbekiston milliy teleradiokompaniyasi raisi Alisher Xadjaev Qozog`istonning O`zbekistondagi favqulodda va muxtor elchisi Erik Utembaev bilan uchrashdi. Muloqot chog`ida ikki mamlakatning axborot sohasidagi o`zaro hamkorligi bo`yicha dolzarb masalalar muhokama qilindi, deya ma`lum qildi "Xalq so`zi" nashri "Kazinform" axborot agentligi xabari asosida.

Unda imzolangan shartnomalar, kelishuvlar va maslahatlashuvlar asosida, shuningdek, ikki davlat hududida teleradiodasturlarni erkin almashish va tarqatish yo`li bilan yagona axborot maydonini yaratish imkoniyatlari ko`rib chiqildi.

"Bugungi uchrashuvda axborot maydoni sohasidagi aloqalar masalalari muhokama qilindi, — deydi E.Utembaev. — Natijada teleradiouzatish jabhasida ikkitomonlama hamkorlikni rivojlantirishga qaratilgan "yo`l xaritasi"ni tuzish bo`yicha kelishuvga erishildi. Mazkur "yo`l xaritasi" ham Qozog`istonda, ham O`zbekistonda ro`y berayotgan ijobiy jarayonlarni ko`rsatish imkonini beradigan qo`shma ilmiy va ta`lim, ayni chog`da axborot dasturlarini yaratishga xizmat qiladi. Shu munosabat bilan O`zbekiston bilan birgalikda qo`shma radio tuzish imkoniyatlari ham ko`rib chiqildi. Aslida bu biz uchun juda yaqin va samarali hisoblanadi, qolaversa, umumiy auditoriya topishda muhim ahamiyatga ega".

U har ikki davlat iqtisodiyotini raqamlashtirish uchun axborot makonida yaqindan integrasiyani yo`lga qo`yish va o`zaro qo`shma texnologiyalarni yaratishi muhimligi haqida ham to`xtalib o`tildi.

MTRK raisi axborot maydonida hamkorlik qilish va birgalikdagi sa`y-harakatlar bilan Markaziy Osiyoda o`ziga xos keskin o`sish namoyish etish orqali mustahkam aloqalar bo`yicha barchaga namuna ko`rsatishga tayyor ekanligini bildirdi.

    Boshqa yangiliklar