Shoxruhxonning romantik ruhdagi konserti qanday o`tdi?

Hushovoz va minglab muxlislarning sevimli xonandasi Shoxruhxon «Istiqlol» san`at saroyida «Yoningdaman» nomi ostida yangi konsert dasturini taqdim etdi. Xonanda muxlislarini nimalar bilan shod etgani haqida Kunutun nashri fotoreportaj tayyorladi. Batafsil quyida tanishing.

Konsert dinamik musiqa va raqqoslar jamoasidan taqdim etilgan raqslar bilan boshlandi.

Va xonanda sahnada «Aldamadim» taronasini ijro etgan holda muxlislari qarshisida paydo bo`ldi. Qo`shiq jarang sochgan vaqt esa zal bo`ylab «muhabbat farishtalari» muxlislarga xonanda singari o`z mehrlarini ulashdi.

Sahna bu safar uchta geometrik shakldagi ekranlar bilan jihozlanganligini ko`rish mumkin bo`ldi.

Juda ham tortinchoq xonanda bu safar muxlislari bilan butun konsert davomida samimiy muloqatda bo`ldi.

Dasturning birinchi qismida Shoxruhxonning barchamizga yaxshi tanish qo`shiqlar jarang sochdi. Ular qatorida «Qo`g`irchoq», «Aprel-may», «Menga farqi yo`q», «Nima qilish kerak» taronalari kuylandi.

Qo`shiqlar aranjirovkasi yangicha talqinda bo`lib, «Komila qiz» ispancha uslubda taqdim etildi.

Har bir qo`shiqqa Zlotnikov Dance Centre va «Tumor» raqs ansambllari go`zal raqslar va sahna ko`rinishlarini ijro etishdi. Xonanda ham ulardan qolishmagan holda sahnada erkin harakatlanib, raqsga tushdi.

Shoxruhhon muxlislarini bu yilgi duetdoshlari bilan hayron qoldirdi. Konsertning ikkinchi qismi Nilufar Usmonova bilan «Barcha shodlik senga bo`lsin» duet tarona bilan boshlandi. Ijodkorlar ishtirokida oilaviy hayotdan sahna ko`rinishi ham taqdim etildi. Pozitiv ruhdagi qo`shiq barchaga manzur bo`ldi.

Opera xonandasi Jenisbek Piyazov bilan ijodiy hamkorlik, Shoxruhxonning muxlislariga butkul kutilmagan sovg`a bo`ldi. Ikki iste`dod ijrosidagi «Sog`inib»qo`shig`i barcha sog`ingan qalblar uchun bag`ishlandi.

Shoxruhxon va Ziyodadan taqdim etilgan «Yig`lama» duet taronasi navbatdagi tuhfalardan bo`ldi.

Xonanda doim ustoz san`atkorlar ijodiga murojaat etib, ular ijodidan qo`shiq kuylaydi. Bu safar xonanda Abdurauf Olimovning «Turfa gullar» qo`shig`ini o`zgacha talqinda ijro etdi.

Qo`shiqdan so`ng, Volidasiga o`g`illik mehrini izhor etgan holda guldasta sovg`a qildi.

Shuningdek, marhum ustoz san`atkor Muxriddin Holiqovning «Qiz bola» qo`shig`ini o`z talqinida ijro etdi. Xonanda bundan avval ham uning bir qancha qo`shiqlarini ijro etgan.

Xonanda barcha kliplarining birinchi tomoshabini Volidasi ekanligini aytib o`tib, «Malikam» qo`shig`iga suratga olingan klipni Volidasi va muxlislariga ilk bora konsertda namoyish etdi.

Xonanda sahnada qo`shiq kuylayotgan vaqtda chiroqlar o`chib qolishi bir zumga barchani shoshirib qo`ydi. Ammo xonanda raqqoslar bilan fonarlardan go`zal ko`rinish va raqs taqdim etishdi.

Xonanda konsertda yangi taronalarini taqdim etishni unutmadi. Ulardan biri «Sevgilim» qo`shig`i bo`ldi.

Shoxruhxon Jahongir Poziljonov bilan esa butun zalni kezib «Boylandim»qo`shiqlarini ijro etdi.

Albatta doimiy ijodiy hamkori maftunkor xonanda Shahzoda bilan ham Shoxruhxon yangi duet kuyladi. Shoxruhxon, Shahzodani bitta qo`shiqni ijro etib ketishga yo`l qo`ymay, «Shoshma» duet taronalarini ham ijro etdilar.

Konsert mehr-muhabbatga to`la va samimiy ruhda o`tdi.

Konsertning ilk kunida shou-biznes vakillaridan Davron Kabulov va rafiqasi, Sharq guruhi, Sanjar Holiqov, boshlovchi Laziza Nozimxonova, Xusan Juraev, Oyxon Iforzoda va Shox Alimovichlar konsertga tashrif buyurishdi.

Konsertdan barcha suratlarni bizning fotohisobotda ko`rishingiz mumkin.