Hindiston Islom akademiyasi – “Dor ul-ulum Devband” telefonlarga rington va chaqiruv musiqasi o`rniga Qur`on oyatlari qo`yish mumkin emas degan fatvo chiqardi va bu bilan Saudiya Arabistoni ulamolarning ayni masaladagi fikrini qo`llab-quvvatladi.
“India.com” saytida muftiy Orif Kozimiyning intervyusi keltirilib, unga ko`ra ulamo fatvoni sharhlagan, deb yozadi O`MI Matbuot xizmati.
“Telefon hojatxonada jiringlab qolishi mumkin. Bunday vaziyatda Qur`on oyatlari yoki azonni eshitish Islom qonunlariga ziddir. Arabistonmi, Hindistonmi yoki er yuzining boshqa nuqtasimi – Islom hamma joyda bir. Shu sababli Saudiya Arabistonida chiqarilgan fatvo bu erda ham muhim”, dedi shayx Kozimiy.
“Bundan tashqari, odamlar ko`pincha telefonga javob berish uchun oyatni yoki azonni yarmidan uzib qo`yadilar. Bu mumkin emas, bu xuddi birov Qur`on tilovat qilayotgan yoki azon aytayotganda, uni to`xtatib qolish bilan teng. Shuningdek, muqaddas Kalomning nopok joylarda yangrashiga yo`l qo`yib bo`lmaydi”.
Ushbu masalada dunyoning ko`plab ulamolari bir xil fikr bildirganlar. Bunga qo`shimcha ravishda eshik qo`ng`iroqlariga ham Qur`on oyatlaridan foydalanish ham nojoiz ekanligi aytilgan.