25 martdan 26 martga o`tar kechasi Toshkent shahridagi Mirzo Ulug`bek tumanida joylashgan "Chopar" kafesi filialida yong`in yuz berdi. Olov qo`shni binoda joylashgan "Les Ailes" kafesiga ham o`tgan, deb xabar qiladi Toshkent IIBB matbuot xizmati.
Yong`in haqidagi xabar tungi soat 2:09 da kelib tushgan. Soat 2:20 da o`t o`chirish jamoasi voqea joyiga etib borgan va soat 2:31 da yong`in to`liq bartaraf etilgan.
Hodisa oqibatida har ikkala binoning tom qismi hamda "Chopar" kafesi filiali binosining ichki qismi zararlangan. Qurbonlar yo`q.
Yong`inga elektr simlarida yuzaga kelgan qisqa tutashuv sabab bo`lganligi taxmin qilinmoqda.
O`z navbatida, YoXB hamda IIBB barchani yong`in xavfsizligi qoidalariga amal qilishga chaqiradi.
