Rossiya jahon chempionatini yirik hisobdagi g`alaba bilan boshladi

JCh-2018 musobaqasining ochilish uchrashuvida Rossiya terma jamoasi Saudiya Arabistoni bilan qarshi bahs olib bordi.

Uchrashuvda mezbonlar yirik — 5:0 hisobida g`alaba qozondi. O`yinning 12-daqiqasida Yuriy Gazinskiy Aleksandr Golovinning uzatmasidan gol kiritib, jamoasini oldinga olib chiqdi.

Birinchi bo`lim yakunida Denis Cherishev raqib jarima maydoni ichida qulay pasni qabul qilib oldi va himoyachilarni chalg`itgan holda jamoasining ikkinchi golini urdi.

Ikkinchi bo`lim boshida maydon egalari bosimni biroz kamaytirishdi va bu o`yin tezligiga o`z ta`siri o`tkazdi. 71-daqiqada zaxiradan maydonga tushganiga ko`p bo`lmagan Artyom Dzyuba boshi bilan darvozani ishg`ol qilib, hisobni 3:0 ko`rinishiga olib keldi.

Hakam tomonidan qo`shib berilgan daqiqalarda Denis Cherishev va Aleksandr Golovin yana bir martada gol kiritib, Rossiya terma jamoasining 5:0 hisobidagi g`alabasini ta`minladi.

Ushbu guruhdagi Misr va Urugvay terma jamoalari o`rtasidagi uchrashuv ertaga, 15 iyun kuni bo`lib o`tadi. O`yin Toshkent vaqti 17:00 da boshlanadi.
Ertaga “V” guruhida birinchi tur uchrashuvlari ham bo`lib o`tadi. Jumladan, soat 20:00 da Marokash — Eron uchrashuvi boshlansa, 23:00 da Ispaniya — Portugaliya uchrashuviga start beriladi.