“Kinematografiyani rivojlantirish markazi» hamda «Yosh kinoijodkorlar kengashi” boshchiligidagi delegasiya 2018 yilning 1-7 iyul kunlari Qozog`istonning Ostona shahrida bo`lib o`tayotgan “Evraziya” xalqaro kinofestivalida ishtirok etishmoqda. Mazkur festival xalqaro kinoprodyusserlar assosasiyasi (FIAPF) ro`yxatidan o`tgan bo`lib, Qozog`iston respublikasi madaniyat va sport ishlari vazirligi tomonidan 14- bor o`tkaziladi. “Evraziya” kinofestivalining asosiy tanlovida kinorejissyor Rashid Malikovning «Sabot» hamda yosh kino ijodkorlar : Abduazim Ilhomjonov va Botir Abduraxmonovning «Mama»-deb nomlangan qisqa metrajli filmlari ishtirok etadi. Konkursdan tashqari o`tadigan dasturda esa, Jahongir Kosimovning “Nazira” badiiy filmi namoyish etilishi ko`zda tutilgan. Shuningdek, mazkur festival doirasida shu yilning kuzida mamlakatimiz poytaxti Toshkentda ilk bor bo`lib o`tishi rejalashtirilayotgan «Prologue» halqaro kinofestivali tashkilotchilari o`rtasida hamkorlik shartnomasi ham imzolanadi. «Evraziya» kinofestivalida bo`lib o`tadigan muloqotlar, o`zaro tajriba almashuv, birgalikdagi hamkorlik bitimlari, tuzilajak shartnomalar kino san`ati va sanoatidagi mavjud muammolarni hal etishi hamda soha rivojiga ijobiy ta`sir etishi turgan gap. Eslatib o`tamiz, 2018 yil Qozog`iston Respublikasida "O`zbekiston" yili deb e`lon kilingan. 14- «Evraziya» xalqaro kinofestivali esa Ostona shaxrining 20 yillik yubileyi arafasida bo`lib o`tmoqda.
01.07.2018 09:53
