Sevimli

Samarqandda “bunker” tashkil qilgan jinoiy guruh qo`lga olindi (video)

Jinoyat 10.08.2018, 10:14
Samarqandda “bunker” tashkil qilgan jinoiy guruh qo`lga olindi (video)

O`zbekiston Bosh prokuraturasi huzuridagi Iqtisodiy jinoyatlarga qarshi kurash bo`yicha departament xodimlari Samarqand viloyatida oliy ta`lim muassasalariga kirish test sinovlarida abiturientlarga yordam berishga uringan bir guruh shaxslarni qo`lga oldi. Bu haqda Bosh prokuratura huzuridagi axborot-tahlil multimedia markazi ma`lum qildi.

Guruh a`zolaridan biri abiturientni Samarqand arxitektura va qurilish institutiga o`qishga kiritib qo`yish evaziga 3 ming dollar olayotganida huquqni muhofaza qilish organlari tomonidan qo`lga olinadi. Shundan so`ng tezkor tadbir o`tkazilib, guruhning joylashgan manzili aniqlandi.

Tergov ma`lumotlariga ko`ra, guruh Samarqand chet tillar instituti talabasi A.A. tomonidan shakllantirilgan. Guruhning har bir a`zosiga vazifalar taqsimlab berilgan bo`lib, biri test savollarini echib beradigan yigit-qizlarni topgan, yana biri esa puli ko`p abiturientlarni izlash bilan shug`ullangan.

“Bunker”larning vaqtinchalik xonadonlari ko`zdan kechirilganida ko`plab fuqarolik pasportlari va ularning nusxalari, abiturientlar ruxsatnomalarining asl nusxalari, davlat test markazining ruxsatnomalari va boshqa hujjatlar topilgan.

A.A. va guruhning boshqa a`zolariga nisbatan Jinoyat kodeksining 168-moddasi 2-qismi “a” va “b” bandlari (bir guruh shaxslar tomonidan oldindan til biriktirish orqali ancha miqdorda firibgarlik qilish), 28-moddasi (jinoyatda ishtirok etish) va 211-moddasi 1-qismi (pora berish) bilan jinoiy ish qo`zg`atildi.

Sharhlar