Gmail asoschilari «mutlaqo yangi» Inbox pochta xizmatini taqdim etishdi

Hi-tech 24.10.2014, 11:01
Gmail asoschilari «mutlaqo yangi» Inbox pochta xizmatini taqdim etishdi

Google korporasiyasi Inbox deb atalgan «mutlaqo yangi» pochta xizmatini taqdim etdi. Uning hozirda mavjud bo`lgan pochta servislaridan asosiy farqi – xatlarni «aql bilan» saralay olishidir. Bu haqda Google Russia blogi xabar bermoqda deb yozadi kun.uz.

Inbox bir-biriga o`xshash xabarlarni (masalan, bankdan kelgan cheklarni) bloklarga ajratib chiqadi va xatlardagi eng muhim axborotni (masalan, chiptani bron qilingani maqomi) chiqarib ko`rsatadi. Bundan tashqari, servisga eslatmalar yozish va qilinadigan ishlar rejasini tuzish imkonini beradigan organayzer ham tatbiq etilgan.

Inbox’dan foydalanish imkoniyati cheklangan: yangi servisdan foydalanish uchun yo undan foydalanayotganlardan taklif olish kerak, yoki bo`lmasa servisdan foydalanish imkoniyatini berishni so`rab inbox@google.com manziliga maktub yo`llash kerak.

Inbox servisi jahondagi eng ommabop pochta xizmatlaridan biri – Gmail jamoasi tomonidan ishlab chiqilgan. Biroq yangi loyiha Gmail’ning bir qismi emas, balki alohida, mustaqil servis sifatida rivojlanadi.

Gmail 2004 yilda ishga tushirilgan edi, oradan sakkiz yil o`tib esa kompaniya ushbu servisdan 425 million kishi foydalanayotganini ma`lum qildi.

Sharhlar