O`zbekistonlik FIFA referisi Ravshan Ermatov 2014 yilda Osiyo qit`asining eng yaxshi hakami bo`lishga nomzodlik qilmoqda.
Bu sovringa shuningdek eronlik hakam Muhammad Alirizo Fag`oniy va bahreynlik Navof Shukrulloh ham da`vogarlik qilmoqda. Bu hakamlarning barchasi Braziliyada bo`lib o`tgan jahon chempionati o`yinlarida ishtirok etgan edilar.
Eslatib o`tamiz, Ravshan Ermatov jahon chempionatlari tarixida eng ko`p uchrashuvlarni boshqargan hakam hisoblanadi. Hamyurtimiz Braziliyada bo`lib o`tgan mundial vaqtida rekord qayd etgan edi. Uning hisobidagi JCh o`yinlari soni 9 taga etgan. Shundan beshta uchrashuv 2010 yili JARda, to`rttasi esa 2014 yili Braziliyada kechgan mundialda o`tkazilgandi.
Eslatib o`tamiz, shu vaqtga qadar jahon chempionatlarida hech bir hakam 8 tadan ko`p o`yin boshqarmagan. Joelyu Kinyu (Fransiya, JCh-1994), Benito Archundii (Meksika, JCh-2010) va Xorxe Larriondelar (Urugvay, JCh-2010) 8 tadan o`yin boshqarib, rekord sohibi bo`lib turgan edilar. Ravshan Ermatov bu rekordni yangilagan.
Manba: www.uff.uz
