Bojxona xodimlari tomonidan huquqni muhofaza qiluvchi idoralar xodimlari bilan hamkorlikda qora va rangli metall parchalarini noqonuniy saqlanishiga hamda savdosiga chek qo`yilmoqda.
Kuni-kecha Qashqadaryo viloyati bojxona boshqarmasi Kontrabanda va bojxona qonunchiligiga qarshi kurashish bo`limi xodimlari hamda viloyat Ichki ishlar bo`limi xodimlari bilan hamkorlikda Chiroqchi tumanida tezkor tadbir o`tkazildi. Tadbir davomida, ushbu tumanda istiqomat qiluvchi fuqaro Q. J. ning yashash xonadoni xolislar ishtirokida ko`zdan kechirildi. Natijada xonadon ayvonida tegishli hujjatlarsiz og`irligi 2 tonna 612 kilogramm rangli metall parchalari noqonuniy saqlab kelinayotganligi aniqlandi.
Shuningdek, o`tkazilgan tadbir davomida fuqaro U.B. boshqaruvidagi ISUZU rusumli yuk avtomashinasi xolislar ishtirokida ko`zdan kechirilganda, pishloqlar ostiga yashirilgan holda umumiy og`irligi 3 tonna 930 kilogramm bo`lgan tegishli hujjatlarga ega bo`lmagan yaroqsiz akkumulyatorlar noqonuniy ravishda olib ketilayotganlik holati aniqlandi.
Yana bir holatda, fuqaro Ch.M. boshqaruvidagi ISUZU rusumli yuk avtomashinasi xolislar ishtirokida ko`zdan kechirilganda, tegishli hujjatlarsiz og`irligi 1 tonna 250 kilogramm qora metall parchalari noqonuniy ravishda olib ketilayotganligi aniqlandi.
Hozirda yuqoridagi holatlar yuzasidan tekshiruv harakatlari olib borilmoqda.
