Jizzax shahridagi “Navro`zbuloq” poygagohida avtokross bo`yicha O`zbekiston chempionati final musobaqalari bo`lib o`tdi. O`zbekiston mudofaasiga ko`maklashuvchi “Vatanparvar” tashkiloti, O`zbekiston milliy avtomobil federasiyasi, Respublika texnik va amaliy sport turlari markazi, Jizzax viloyat hokimligi hamkorligida tashkil etilgan musobaqada Toshkent, Namangan, Samarqand, Buxoro, Qashqadaryo, Surxondaryo va mezbon Jizzax viloyati avtosport ustalari o`zaro kuch sinashdilar. Bu haqda olamsport.com nashri xabar beradi.
“Baggi” rusumidagi avtomobil haydovchilari o`rtasidagi bahsda jizzaxlik G`ayrat Odilov marraga birinchi bo`lib etib keldi. Ikkinchi o`rin Samarqand viloyati vakili Suxbat Obidjonovga, uchinchi o`rin esa yana bir qashqadaryolik sportchi Spartak Ro`zievga nasib etdi.
“A-7” rusumli avtomobillar poygasida toshkentlik Farhod Daminov birinchi, jizzaxlik Baxtiyor Toshboev va Sarvar Tojiqulovlar esa ikkinchi va uchinchi o`rinni egalladilar.
“A-8” rusumli avtomobillar baxsida esa toshkentlik G`ofir Husanov birinchi, sportchilar Suhbat Obidov va Jamol Zokirovlar ikkinchi va uchinchi o`rinlarni band etdilar.
“Neksiya” rusumidagi avtomobillar musobaqasida Toshkent shahri vakili Rustam Muhammedov, Igor Gaziyans va namanganlik Eldor Eshmatov kuchli uchlikdan joy oldi.
Umumjamoa hisobida yil yakuni bilan Jizzax viloyati jamoasi birinchi, Toshkent shahri sportchilari ikkinchi va samarqandliklar uchinchi o`rinni egalladilar.