Bugun Senatda Oliy Majlis Senati Raisi Tanzila Narbaevaning Rossiya Federasiyasi Federal Majlisi Federasiya Kengashi Raisi Valentina Matvienko bilan uchrashuvi bo`lib o`tdi.
Uchrashuvda qayd etilganidek, ikki davlat rahbarlari mamlakatlarimiz va xalqlarimiz o`rtasidagi hamkorlikni kengaytirishga katta ahamiyat bermoqda. Xususan, o`tgan ikki yilda O`zbekiston-Rossiya strategik va ittifoqchilik hamkorligini rivojlantirishda yangi bosqich boshlandi.
Keyingi vaqtda O`zbekiston va Rossiya parlamentlararo muloqoti faollashgani ta`kidlandi. Faqatgina o`tgan yilda parlament darajasida 10 dan ortiq turli o`zaro tashrif amalga oshirildi.
Uchrashuvda Senat Raisi T.Narbaeva O`zbekiston va Rossiya parlamentlari o`rtasidagi munosabatlar ikki tomonlama hamkorlikning yangi kun tartibi doirasida rivojlanayoganini ta`kidladi.
2017 va 2018 yillarda davlat rahbarlari ishtirokidagi sammitlar bunga misol.
– Prezidentlarimiz tashabbusi bilan O`zbekiston – Rossiya strategik sheriklik va ittifoqchilik munosabatlarini mustahkamlanib bormoqda. Ikki davlatni doimo do`stlik rishtalari bog`lab kelgan. So`nggi yillardagi O`zbekiston-Rossiya hamkorlik aloqalari boshqa mamlakatlar, ularning rahbarlari uchun namuna bo`lib xizmat qiladi. Biz bugun mintaqaviy hamkorlikka urg`u bergan holda, parlamentlararo aloqalarni yanada rivojlantirishga kelishib oldik, – dedi Tanzila Norboeva.
V.Matvienko Shavkat Mirziyoev va Vladimir Putinning tashriflari barcha darajalarda va yo`nalishlarda o`zaro teng hamkorlikni kengaytirish hamda chuqurlashtirishga kuchli turtki berganligini ta`kidladi.
– O`zbekiston Rossiyaning eng yaqin strategik hamkori, ittifoqdoshi. O`tgan uch yilda o`zaro tovar ayirboshlash hajmi ortdi, savdo-iqtisodiy hamkorlik sifat jihatdan yangi bosqichga ko`tarildi. Rossiyadan O`zbekistonga kiritilayotgan investisiyalar hajmi bugungi kunda yuqori o`ringa chiqdi. AES qurilishi bo`yicha loyiha amalga oshirilmoqda. Hamkorlik teng huquqli asosda, o`zaro manfaatlarni hisobga olgan holda, o`zaro hurmat ruhida yo`lga qo`yilgan. Davlatlarimiz hamkorligida parlamentlararo munosabatlar muhim o`rin tutadi. Oliy Majlis Parlamentlararo assambleya oilasiga qaytgani quvonarli holdir, – dedi Valentina Matvienko.
Uchrashuv yakunida O`zbekiston Respublikasi Oliy Majlisi huzuridagi Qonunchilik muammolari va parlament tadqiqotlari instituti hamda Rossiya Federasiyasi Federal Majlisi Federasiya Kengashining Tahliliy huquqiy boshqarmasi o`rtasida hamkorlik to`g`risida memorandum imzolandi.
Tashrif davom etmoqda.
Fotomuxbirimiz Omil Xakimov ushbu jarayondan fotoreportaj tayyorladi.
