Бугун Сенатда Олий Мажлис Сенати Раиси Танзила Нарбаеванинг Россия Федерацияси Федерал Мажлиси Федерация Кенгаши Раиси Валентина Матвиенко билан учрашуви бўлиб ўтди.
Учрашувда қайд этилганидек, икки давлат раҳбарлари мамлакатларимиз ва халқларимиз ўртасидаги ҳамкорликни кенгайтиришга катта аҳамият бермоқда. Хусусан, ўтган икки йилда Ўзбекистон-Россия стратегик ва иттифоқчилик ҳамкорлигини ривожлантиришда янги босқич бошланди.
Кейинги вақтда Ўзбекистон ва Россия парламентлараро мулоқоти фаоллашгани таъкидланди. Фақатгина ўтган йилда парламент даражасида 10 дан ортиқ турли ўзаро ташриф амалга оширилди.
Учрашувда Сенат Раиси Т.Нарбаева Валентина Матвиенкони Россия Федерацияси Федерал Мажлиси Федерация Кенгаши Раислигига учинчи марта қайта сайлангани билан табриклади. Келгуси фаолиятида муваффақиятлар тилади.
– Ўзбекистон ва Россия парламентлари ўртасидаги муносабатлар икки томонлама ҳамкорликнинг янги кун тартиби доирасида ривожланмоқда. Президентларимиз ташаббуси билан Ўзбекистон – Россия стратегик шериклик ва иттифоқчилик муносабатларини мустаҳкамланиб бормоқда. Икки давлатни доимо дўстлик ришталари боғлаб келган. Сўнгги уч йилдаги Ўзбекистон-Россия ҳамкорлик алоқалари бошқа мамлакатлар, уларнинг раҳбарлари учун намуна бўлиб хизмат қилади. Биз бугун минтақавий ҳамкорликка урғу берган ҳолда парламентлараро алоқаларни янада ривожлантиришга келишиб олдик, – деди Танзила Норбоева.
В.Матвиенко Ўзбекистонга таклиф этилгани, Россия делегацияси юқори даражада кутиб олингани учун миннатдорлик билдирди. Ҳамда Ўзбекистонда 1 октябрь - Ўқитувчи ва мурабббийлар куни кенг нишонлангани муносабати билан Т.Нарбаевани ушбу касб эгаси бўлганини эслатган ҳолда байрам билан қутлади.
– Ўзбекистон Россиянинг энг яқин стратегик ҳамкори, иттифоқдоши. Ўтган уч йилда ўзаро товар айирбошлаш ҳажми ортди, савдо-иқтисодий, гуманитар ҳамкорлик сифат жиҳатдан янги босқичга кўтарилди. Икки мамлакатнинг ўзаро товарайирбошлаш ҳажми ўтган йили 20 фоизга, жорий йилнинг биринчи ярмида яна 12 фоизга ортди. Юқорилаш сифат жиҳатдан ҳам кузатилди. Россиядан Ўзбекистонга киритилаётган инвестициялар ҳажми ҳам бугунги кунда юқори ўринга чиқди. Ўзбекистонда 1600 компания Россия маблағига, Россияда эса 600 дан зиёд компания Ўзбекистон маблағига қурилган. Марказий Осиёда биринчи АЭС қурилиши бўйича лойиҳа Россия билан ҳамкорликда амалга оширилмоқда. Ҳамкорлик тенг ҳуқуқли асосда, ўзаро манфаатларни ҳисобга олган ҳолда, ўзаро ҳурмат руҳида йўлга қўйилган, – деди Валентина Матвиенко.
В.Матвиенконинг маълум қилишича, 2020 йилнинг февраль ойида Ўзбекистон Республикаси Президенти Шавкат Мирзиёев расмий ташриф билан Россия Федерациясига боради. Ташриф мобайнида 12 янги давлатлараро ҳамда ҳукуматлараро битимлар имзоланиши кутилмоқда.
Шунингдек, Россияда Иккинчи ҳудудлараро форумга ҳам тайёргарлик кетмоқда. Мазкур Форум биринчи марта 2018 йилнинг октябрида Тошкентда ўтказилган эди.
Ўзбекистон раҳбарининг Россияга ташрифи доирасида Биринчи Россия-Ўзбекистон гуманитар форуми ташкил этилади.
Россия Федерал Мажлиси Федерация Кенгаши Раиси Ўзбекистон Сенати Раисини жорий йилнинг октябрь ойида Санкт-Петербург шаҳрида бўлиб ўтадиган Мустақил Давлатлар Ҳамдўстлиги (МДҲ) иштирокчи давлатларининг Парламентлараро Ассамблеяси (PA) Кенгашининг йиғилишига таклиф этди. Ушбу Ассамблеяга Ўзбекистон 2018 йилда аъзо бўлди.
Учрашув якунида Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти ҳамда Россия Федерацияси Федерал Мажлиси Федерация Кенгашининг Таҳлилий ҳуқуқий бошқармаси ўртасида ҳамкорлик тўғрисида меморандум имзоланди.
Матвиенконинг юртимизга ташрифи давом этмоқда.
Фотомухбир: Омил Хакимов
