“Kafil shou” o`ynab, “Tracker” avtomashinasini yutib olgan fuqaro yutug`ini ololmagach, Prezident portaliga murojaat qilishga majbur bo`ldi.
Iste`molchilar huquqlarini himoya qilish jamiyatlari Federasiyasining ma`lumotlariga ko`ra, yutuqli o`yinlarda ishtirok etib, mukofotini ololmagan fuqaroga yutug`i olib berilgan.
Fuqaro Sh Abrorov Joriy yilning 23 iyul sanasida “Mahalla” telekanalida sug`urta kompaniyasining “Kafil shou” ko`rsatuvida ishtirok etib, “Tracker” avtomashinasini yutib olsa-da, kompaniya mukofotni berishda shoshilmayotganidan norozi bo`lgan.
Fuqaroning norozilik murojaati O`zbekiston Respublikasi Prezidenti ishonch telefoni orqali Iste`molchilar huquqini himoya qilish federasiyasiga yo`naltirilgan.
Federasiya murojaatni “Kafil sug`urta” kompaniyasiga borib o`rgangan hamda fuqaroga “Tracker” avtomashinasi tez orada olib berilgan. Federasiya vakillari ana shunday holatlarda fuqarolarga o`z huquqlarini himoya qilishga chorlamoqda.