Savol: “Negadir keyingi paytlarda qornim ko`p quldurayapti. Buning sababi nima? Uni bartaraf qilish mumkinmi?”
Nurbek, Xorazm viloyati.
Oliy toifali shifokor Yorqinoy Toshpo`latova javob beradi:
–Qorin quldurashi bir qator sabablar masalan, parhezning buzilishi, hazm qilish a`zolari faoliyatidagi nosozliklar, hatto asab tizimi kasalligi – nevroz tufayli ham paydo bo`lishi mumkin. Quldurash sababini shikoyatlarga qarab (jig`ildon qaynaydimi, sutkaning qaysi paytida kuzatiladi, uni nima qo`zg`atishi mumkin va hokazo) faqatgina shifokor aniqlaydi.
Bunday alomatlarning eng ko`p sababi gaz hosil qiluvchi mahsulotlar hisoblanadi. Bularga dukkaklilar, turp, karamning barcha turlari, kartoshka, shovul, uzum, xom piyoz, sholg`om, yangi sog`ilgan sut, qora non kabilar kiradi.
Bu muammoni bartaraf etish uchun ovqatlanish tartibiga rioya qiling: har doim bir xil vaqtda ovqatlaning, taomlanish oralig`i juda uzoq bo`lmasligi kerak. Ortiqcha gaz hosil qiladigan mahsulotlar iste`molini cheklang, nordon gazlangan ichimliklarni kamroq iching. Tarkibida oqsil bo`lgan mahsulotlar: go`sht, baliq, tvorog, qatiq va boshqalarni eyishga harakat qiling.
Har qanday noto`g`ri tutilgan parhez hazm qilish a`zolari ishini buzadi. Ovqatni kam-kamdan yaxshilab chaynab, shoshilmasdan eyish kerak. Ovqatlanish paytida asabiylashmaslik muhim. Va, albatta, jiddiy kasallik yo`qligini bilish uchun gastroenterolog shifokorga murojaat qilish zarur.
