Fuqarolik holati dalolatnomalarini yozish organlari tomonidan arxiv hujjatlarini berish bo`yicha davlat xizmati ko`rsatishning ma`muriy reglamenti tasdiqlandi. Bu haqida O`zA ma`ul qildi.
Mazkur hukumat qaroriga ko`ra, jismoniy shaxslarga Fuqarolik holati dalolatnomalarini yozish organlari tomonidan arxiv hujjatlarini berish bo`yicha davlat xizmatlari ko`rsatishning ma`muriy reglamentiga muvofiq yangi tartib kuchga kirdi. Ya`ni fuqarolik holati dalolatnomalarini yozish va notarial organlar sohasida hamda rasmiy hujjatlarga apostil qo`yish Davlat xizmatlari markazi yoki yagona interaktiv davlat xizmatlari portali (YaIDXP) orqali amalga oshiriladigan bo`ldi.
“Reglament jismoniy shaxslarga FHDYo bo`limlari arxivlari tomonidan tug`ilganlik, nikoh tuzilganligi, o`lim hamda nikohdan ajralganlik haqidagi dalolatnoma yozuvlari mavjud yoki mavjud emasligi to`g`risidagi ma`lumotlarni berish bo`yicha davlat xizmati ko`rsatish tartibini belgilaydi, – deydi Davlat xizmatlari agentligi Farg`ona viloyati boshqarmasi bo`lim boshlig`i Shahnoza Imomova. – Davlat xizmatlari markazlari va FHDYo organlari o`rtasida axborot almashinuvi elektron raqamli imzoni majburiy tartibda faqat idoralararo elektron o`zaro bog`lanish yordamida amalga oshiriladi. Soddaroq qilib aytganda, Davlat xizmatlari markazi xodimi ariza beruvchi nomidan so`rovnomani belgilangan tartibda elektron tarzda to`ldiradi. So`rovnomaga zarur ma`lumotlar rasmiylashtirilgandan so`ng arizachi uni o`z elektron raqamli imzosi bilan tasdiqlaydi. Shundan so`ng, barcha hujjatlar 10 daqiqa mobaynida tegishli FHDYo organiga elektron shaklda yuboriladi. FHDYo organi so`rovnoma tushgan vaqtdan boshlab 1 ish soati mobaynida matrik shtrixli kod qo`yilgan ma`lumotnomani rasmiylashtiradi hamda tegishli Davlat xizmatlari markaziga yuboradi. So`rovnomada so`ralayotgan ma`lumotlar FHDYo organida mavjud bo`lmaganda FHDYo organi so`rovnomani tegishli ravishda viloyat FHDYo arxivlariga yuboradi va Davlat xizmatlari markazini elektron tarzda xabardor qiladi. Bunda Davlat xizmatlari markazi ariza beruvchiga axborot-kommunikasiya tizimi orqali xabar beradi. Bu yangi tartib esa fuqarolarning bir necha idoralar o`rtasida sarson bo`lmasligini ta`minlaydi.
E`tiborli jihati shundaki, viloyat FXDYo arxivlari so`rovnoma tushgan kundan boshlab 3 ish kuni mobaynida ma`lumotlarni tegishli FHDYo organlarida mavjud yoki mavjud emasligini aniqlab, matrik shtrixli kod qo`yilgan ma`lumotni rasmiylashtirib tegishli Davlat xizmatlari markaziga yuboradi. Markaz esa shu ma`lumotnomani 10 daqiqa ichida zudlik bilan ariza beruvchining elektron manziliga yuboradi. Davlat xizmatlari markazlari va FHDYo organlari o`z faoliyatini amalga oshirishi natijasida olingan ma`lumotlarni sir saqlanishini ta`minlaydi.
