2025-yil 11-aprel kuni Samarqand shahrida yo‘l-transport hodisasi yuz berdi. Bu haqda Samarqand viloyati IIB axborot xizmati ma’lum qildi.
Qayd etilishicha, ushbu holat soat 20:00 atrofida “Nurli yo‘l” mahallasidagi “Rudakiy” ko‘chasida sodir bo‘lgan.
1997-yilda tug‘ilgan fuqaro boshqaruvidagi “Lacetti” rusumli avtomobil piyodalar o‘tish yo‘lagidan yo‘lni kesib o‘tayotgan fuqarolarni urib yuborgan.
Hodisa oqibatida bir nechta piyoda turli darajadagi tan jarohatlarini olgan va zudlik bilan shifoxonaga yetkazilgan. Ularga shifokorlar tomonidan birlamchi tibbiy yordam ko‘rsatilgan.
Mazkur holat yuzasidan Samarqand shahri bo‘yicha IIO FMB huzuridagi Tergov bo‘limi tomonidan O‘zbekiston Respublikasi Jinoyat kodeksining 266-moddasi 2-qismi bilan jinoyat ishi qo‘zg‘atildi.
Haydovchiga nisbatan “qamoqqa olish” ehtiyot chorasi qo‘llanilgan.
