O`zbekistonlik yosh kinoijodkorlar joriy yil 26 noyabr-1 dekabr kunlari davom etadigan “DigiCon6 Asia Awards-2019” xalqaro qisqa metrajli filmlar festivalida ishtirok etadi. Ushbu kinofestivalga yo`llanma olgan ijodkorlar guruhi Gonkongga jo`nab ketdi, deya xabar berdi "O`zbekkino" Milliy agentligi matbuot xizmati.
Osiyo bo`yicha iqtidorli mualliflarni topish, tanitish va ularning ajoyib ishlari uchun rag`batlantirish maqsadida har yili kuzda o`tkazib kelinadigan “DigiCon6 Asia Awards” mukofotiga o`zbekistonlik yosh kinoijodkorlarning ikkita filmi - Shokir Xoliqovning “Choy” va Mahliyo Asqaralievaning “Sovg`a” filmi taqdim etildi. Jami o`zbekistonlik vakillar etti kishidan iborat.
- Yosh kinoijodkorlar - milliy kinematografiyaning kelajagi, shu sabab ularning ijodiy mahorati oshishiga katta e`tibor qaratish lozim, - deydi “O`zbekkino” rahbari Firdavs Abduxoliqov. - Bizning iqtidorli yigitlar bunday nufuzli festivalda O`zbekistonda yosh kinoijodkorlar uchun yaratilgan shart-sharoitlar va o`zlarining qobiliyati tufayli ishtirok etishmoqda, deya qo`shimcha qildi u.
- - Kelgusida “O`zbekkino” yosh kinoijodkorlar mahoratini oshirish uchun ularni har tomonlama qo`llab-quvvatlash maqsadida bir qator loyihalar tashkillashtirishini ta`kidlab o`tdi Abduxoliqov.
- Biz “O`zbekkino” milliy agentligi qoshida Yoshlar ijodiy markazi va yoshlar ijodiy studiyasini tashkil etishni rejalashtiryapmiz. Bundan tashqari, barcha kerakli uskunalar bilan jihozlangan 150 o`rinli ijodiy laboratoriyani ochishni mo`ljalladik, - dedi “O`zbekkino” rahbari.
Shuni qayd etish kerakki,”DigiCon6 ASIA” ga qatnashadigan davlatlar Yaponiya, Xitoy, Gonkong, Hindiston, Indoneziya, Koreya, Malayziya, Singapur, Tayvan, Tailand. O`zbekiston festivalda ilk marotaba ishtirok etmoqda. Yaponiyaning yirik media kinokompaniyasi TBS kinofestival tashkilotchisi hisoblanadi.
Suratda: “Sovg`a” kinofilmi rejissyori Mahliyo Asqaralieva, Kann xalqaro kinofestivalida “Choy” filmi uchun Gran-pri sohibi, Shokir Xoliqov, “FOKUS” kinomaktabi asoschisi va direktori Mariya Musakova.