Ayni paytda davom etayotgan Senat yalpi majlisida senatorlar tomonidan “Davlat boji to`g`risida”gi, “Investisiyalar va investisiya faoliyati to`g`risida”gi, “Milliy gvardiya to`g`risida”gi hamda “Maxsus iqtisodiy zonalar to`g`risida”gi O`zbekiston Respublikasi Qonunlari muhokama qilindi va ma`qullandi.
Ta`kidlanganidek, “Davlat boji to`g`risida”gi qonun Soliq kodeksi yangi tahrirda ishlab chiqilishi munosabati bilan, shuningdek, davlat bojini belgilash, undirish, undan ozod qilish va uni qaytarish sohasidagi munosabatlarni tartibga solish maqsadida Moliya vazirligi tomonidan ishlab chiqilgan.
Qonunda davlat boji undiriladigan ob`ektlar va davlat boji stavkalarining miqdorlari nazarda tutilmoqda. Shu bilan birga, fuqarolik ishlari bo`yicha sudlarda, iqtisodiy sudlarda va ma`muriy sudlarda, notarial harakatlar amalga oshirilganda, fuqarolik holati dalolatnomalarini qayd etishda, O`zbekiston Respublikasi fuqarosi biometrik pasportini rasmiylashtirish va berishda, shu jumladan xorijga chiqish uchun biometrik pasport rasmiylashtirish va berishda, konsullik yig`imini to`lashda davlat bojini to`lashdan ozod qilish tartibi va ozod qilinadigan shaxslar ro`yxati belgilanmoqda.
“Investisiyalar va investisiya faoliyati to`g`risida”gi Qonunmuhokamasida so`zga chiqqanlar bugun O`zbekiston Respublikasidagi investisiya faoliyati 20 yil avval qabul qilingan va hozirgi zamon talablariga javob bermaydigan qonunlar bilan tartibga solinganini qayd etishdi. Shu munosabat bilan mazkur Qonun ishlab chiqilib, u O`zbekiston Respublikasi qonun hujjatlari tizimiga yagona birlashtirilgan hujjat sifatida kiritiladi.
Hujjatda belgilanishicha, pul mablag`lari (shu jumladan chet el valyutasi) va boshqa moliyaviy mablag`lar, shu jumladan kreditlar, paylar, ulushlar, aksiyalar va boshqa qimmatli qog`ozlar, ko`char va ko`chmas mol-mulk hamda boshqa ob`ektlar investisiya resurslari jumlasiga kiradi.
“Maxsus iqtisodiy zonalar to`g`risida”gi Qonun muhokamasida “Maxsus iqtisodiy zonalar to`g`risida”gi Qonunning amaldagi tahriri erkin iqtisodiy zonalar faoliyatini kompleks tartibga solmasligi va takomiliga etkazilishi zarurligi qayd etildi. Qonunosti hujjatlarining ko`pligi, to`g`ridan-to`g`ri ta`sir qiladigan maxsus qonun hujjati mukammal emasligi va barcha zarur masalalar tartibga solinmaganligi tafovutlar va potensial investorlarda bu sohadagi qonun hujjatlari barqarorligi to`g`risida salbiy fikr paydo bo`lishiga olib keladi.
Qonun maxsus iqtisodiy zonalarning turlari va ularning faoliyatini tashkil etish chora-tadbirlari, faoliyat ko`rsatish muddatini uzaytirish, chegaralarini o`zgartirish va uni tugatish, maxsus iqtisodiy zonalarning faoliyatini tashkil etish, ularni boshqarish, maxsus iqtisodiy zonaning ishtirokchisi maqomini belgilash, bojxonada tartibga solish, soliq solish va erdan foydalanish rejimi bo`yicha asosiy tushunchalar hamda qoidalar belgilanmoqda.
“Milliy gvardiya to`g`risida”gi Qonun esa Milliy gvardiyaning maqomi, vakolatlari, vazifalari va funksiyalarini belgilash maqsadida ishlab chiqilgan.
Qonunga ko`ra Milliy gvardiya O`zbekiston Respublikasi Qurolli Kuchlari tarkibiga kiruvchi harbiy tuzilmalarga ega bo`lgan huquqni muhofaza qiluvchi organdir.
Jamoat tartibi va xavfsizligi, shu jumladan, ommaviy tadbirlar, mitinglar, yig`ilishlar, namoyishlar o`tkazilayotganda hamda fuqarolar gavjum bo`ladigan joylarda jamoat tartibi va xavfsizligini ta`minlashda, tabiiy va texnogen xususiyatga ega favqulodda hodisalarni bartaraf etishda hamda huquqbuzarliklarning oldini olish, ularni aniqlash va ularga chek qo`yish maqsadida jamoat joylarida patrullik qilishda ishtirok etish Milliy gvardiyaning asosiy vazifalari sifatida ko`rsatilmoqda.
Qonunga ko`ra, Milliy gvardiyaning tarkibi mustahkamlanmoqda. Jumladan, Milliy gvardiyaning tarkibiga markaziy devon, hududiy boshqarmalar, harbiy tuzilmalar, ta`lim va tibbiyot muassasalari, shuningdek Milliy gvardiyaning zimmasiga yuklatilgan vazifalarni bajarish uchun tashkil etiladigan boshqa bo`linmalar va tashkilotlar kiradi.
Shu bilan birga, Milliy gvardiya bevosita O`zbekiston Respublikasi Prezidentiga bo`ysunadi va unga hisobdordir, Milliy gvardiyaga O`zbekiston Respublikasi Prezidenti tomonidan lavozimga tayinlanadigan va lavozimidan ozod etiladigan Milliy gvardiya qo`mondoni rahbarlik qiladi. Milliy gvardiya qo`mondoni maqomiga ko`ra vazirga tenglashtiriladi.
