Mudofaa tizimida kasb bayrami nishonlandi

Qurolli Kuchlar akademiyasida Mudofaa vazirligi tarbiyaviy va mafkuraviy ishlar organi xodimlarining kasb bayrami tantanali tarzda nishonlandi, deya xabar berdi Mudofaa vazirligi Axborot va ommaviy kommunikasiyalar departamenti.

Tadbirda Mudofaa vazirining tarbiyaviy va mafkuraviy ishlar bo`yicha o`rinbosari polkovnik Xamdam Karshiev va boshqalar mamlakatimizda mudofaa qudratini mustahkamlash, harbiy xizmatchilarning ma`naviy-ma`rifiy tayyorgarligini yuksaltirishda komandirlarning tarbiyaviy va mafkuraviy ishlar bo`yicha o`rinbosarlari, qolaversa, kadrlar organi hamda ommaviy axborot vositalarining o`rni alohida ekanini ta`kidladi.

Mazkur tadbirni barcha harbiy okruglarda videokonferens-aloqa orqali to`g`ridan-to`g`ri kuzatish imkoniyati yaratildi.

Tantanali bayramda Mudofaa vazirligi qo`shinlari o`rtasida o`tkazilgan «Eng ilg`or tarbiyaviy va mafkuraviy ishlar organi ofiseri», «Eng ilg`or kadrlar organi ofiseri», «Eng ilg`or harbiy qism psixologi» tanlovlarining respublika bosqichi g`oliblari diplom va qimmatbaho sovg`alar bilan taqdirlandi. 

Shuningdek, yosh avlodni harbiy-vatanparvarlik ruhida tarbiyalash ishlariga munosib hissa qo`shib kelayotgan bir guruh ofiserlar, Qurolli Kuchlar xizmatchilariga vazirlikning faxriy yorliq va esdalik sovg`alari topshirildi. «Namunali xizmatlari uchun» va “Yoshlarni harbiy-vatanparvarlik ruhida tarbiyalashdagi faol ishtiroki uchun” nishonlari ham yurt himoyasiga kamarbasta ofiserlar va faxriylarning ko`kragini bezadi.

Qurolli Kuchlar Markaziy ashula va raqs ansambli hamda taniqli xushovoz xonandalarning diltortar kuy-qo`shiqlari barcha harbiy xizmatchilarning ko`nglini xushnud etdi. Betakror musiqiy navolar bayramona raqslarga ulandi.

Ma`lumot uchun: har yili dekabr oyining ikkinchi yakshanbasi Mudofaa vazirligi tarbiyaviy va mafkuraviy ishlar organi xodimlarining kasb bayrami sifatida keng nishonlanadi.