O`zbekiston Respublikasi delegasiyasining Yaponiyaga tashrifi doirasida Toshkent shahrining hokimi Jahongir Artikxodjaev Nagoya shahrida shahar meri Takashi Kavamura bilan uchrashdi.
Uchrashuvda janob Takashi Kavamura O`zbekistondagi samimiy va do`stona qabul uchun minnatdorlik bildirdi va Toshkent bilan turli sohalarda o`zaro manfaatli hamkorlikni olib borishdan mamnunligini aytib o`tdi.
Ta`kidlash joiz, mazkur tashrif davomida ikki tomonlama munosabatlarni yangi bosqichga olib chiqishga xizmat qiladigan qator hujjatlar imzolanishi ko`zda tutilgan.
Xususan, Toshkent va Nagoya o`rtasida o`zaro hamkorlikka oid shartnoma imzolanishi rejalashtirilgan.
Shuningdek, ikki shahar o`rtasidagi munosabatlarning keyingi bosqichida shahar qurilishi, infratuzilmani rivojlantirish, transport, turizm, ilmiy-texnika va sog`liqni saqlash sohasidagi keng ko`lamli loyihalarni birgalikda amalga oshirilishi ham ko`zda tutilgan.
Shuningdek Jahongir Artikxodjaev Nagoya shahar Assambleyasi raisi Xiroshi Niua bilan uchrashdi.
O`zaro muloqot davomida ikki tomon ham shahar deputatlari Kengashining faoliyatiga to`xtalib o`tdi.
Uchrashuv davomida Xiroshi Niua Nagoya shahar Assambleyasi tarkibida O`zbekiston bilan do`stlik ligasi tashkil etilganligini mamnuniyat bilan qayd etdi va unga Assamleyaning 68 nafar vakilidan 35 nafari a`zo bo`lib kirganligini ma`lum qildi.
Tomonlar Toshkent shahar deputatlar Kengashi va Nagoya shahar Assambleyasi o`rtasida do`stlik aloqalarini o`rnatish va rivojlantirish bo`yicha kelishuvga erishdilar.
Jahongir Artikxodjaev Assambleya raisini a`zolari bilan birga Toshkent shahriga taklif qildi.
Eslatib o`tamiz, O`zbekiston Respublikasi Prezidenti Shavkat Mirziyoev Yaponiya Bosh vaziri Sindzo Abening taklifiga binoan 17 dekabr kuni rasmiy tashrif bilan ushbu mamlakatga jo`nab ketdi.