Ijtimoiy tarmoqlarda Mirishkor tumani hokimi ovozi ekanligi aytilgan audioyozuv tarqaldi. Unda 28 fevral kuni tuman hokimligida bo`lib o`tgan yig`ilishda hokim mahalla raislarini haqoratlab, "haromi", "kuchukvachcha" deya ta`rif bergan.
Ma`lum bo`lishicha, mahalla raislari topshiriqni bajarmagan. Buning uchun hokim ularni haqoratlagan va urgan.
Hokim bisotidagi eng jirkanch so`zlar bilan mahalla raislarini siylab zaldan chiqqach, raislar tilga kiradi va bu holatda ishlab bo`lmasligini, hokim onasini so`kishiga jim turolmasligini aytadi. Shunda bu gapni eshitgan hokimlik mas`uli “nima kerak provakasiya” deya savol beradi.
Mahalla raislarining so`ziga ko`ra, hokim soliq tushumi kamligi uchun mahalla raislarini haqorat qilgan. Mahalla raislari esa shuni yotig`i bilan tushuntirishsa, hatto o`z yonlaridan bo`lsa-da pul tushirishlarini aytadi.
Ijtimoiy tarmoqda Mirishkor tumani hokimi B.Radjabovning audioyozuvi tarqalishi yuzasidan viloyat hokimligi munosabat bildirdi.
"Audioda turli xil uyatli so`zlar bilan yig`ilganlarni "siylagan" tuman hokimi ekanligi aniq, inkor etish fikridan yiroqmiz. Bu borada ichki tartibda chora ko`rish bilan cheklanish ham mumkin edi. Ammo, qonuniy ravishda chora ko`rilishi, "Nega oddiy xalq xato qilsa, jazo yoki jarima, hokim xato qilsa, kechirimmi?" kabi tabaqalashtiruvchi gap-so`zlar kelib chiqmasligi tarafdorimiz.
Tegishli tashkilotlar tomonidan o`rganishlar yakunlanishi bilan holat bo`yicha qo`shimcha ma`lumotlarni e`lon qilamiz", deydi Qashqadaryo viloyat hokimligi Axborot xizmati xabarda.
