Koronavirusdan tuzalgan ayol yana qayta infeksiyaga chalindi

RIA Novosti axborot agentligi “Txai Rat“ gazetasiga asoslanib xabar berishicha, tailandlik ayol koronavirus infeksiyasidan sog`ayganidan so`ng oradan hafta o`tib yana kasallikka chalingan. Bu haqda “Txai Rat“ gazetasiga Chayyapxum provinsiyasi sog`liqni saqlash departamenti ma`lum qilgan.

Mart oyi boshida xorijdan qaytib kelgan 38 yoshli ayol kasallikka chalinib, 12 mart kuni Bankokda shifokorga uchragan. U koronavirus uchun test topshirganda natija ijobiy bo`lib chiqqan. Bemor poytaxtdagi shifoxonalardan birida ikki haftadan ko`proq vaqt davolanib, tuzalib chiqqan.

Oy oxirida Chayyapxum provinsiyasiga qaytgan ayol 4 aprel kuni yana shamolash alomatlari bilan shifokorga murojaat qiladi. Undan koronavirus uchun uch marotaba olingan test natijalari ijobiy bo`lib chiqdi. Oqibatda bemor yana yuqumli kasalliklar shifoxonasiga yotqizildi.

– Bu g`ayritabiiy holat, ammo u Bankokdagi epidemiologik tadqiqotlar bo`yicha kasalxona vrachlarining ko`rsatmalari va tibbiy hujjatlar asosida tasdiqlandi, – deydi Chayyapxum provinsiyasi sog`liqni saqlash departamenti boshlig`i Vatchira Botpxibun.

Koronavirus Chayyapxumni deyarli zararlamagan. Provinsiyada infeksiyaga chalinish bo`yicha bor-yo`g`i to`rtta holat, jumladan, ikki marta kasal yuqtirgan ayol va ikki bemor qayd etilgan.

Ma`lumotlarga ko`ra, Tailandda epidemiya boshlangandan buyon koronavirus infeksiyasiga chalinish bo`yicha 2 ming 423 holat qayd etilgan. Shundan 940 kishi to`la sog`ayib ketgan, 32 bemor halok bo`lgan.