Bugun ham o`tgan kunlardagi kabi koronavirus infeksiyasini yuqtirgan ko`plab bemorlar sog`ayib, reabilitasiyaga kuzatildi. Barchamiz uchun quvonchli bo`lgan ushbu jarayonda shifokorlarimizning hissasi ulkan ekanini, yana bir bor, alohida e`tirof etish joiz.
Ayni shu soatlarda Andijon viloyatida 27 nafar, Surxondaryo viloyatida 7 nafar, jami 34 nafar bemor butkul sog`aydi. Ular viloyatlar sog`liqni saqlash boshqarmalari mas`ullari ishtirokida reabilitasiyaga kuzatildi.
Endilikda darddan forig` bo`lganlar Andijonda 88 nafarni, Surxondaryoda esa 18 nafarni tashkil qilmoqda.
Shunday qilib, bugunning o`zida 100 nafar bemor tuzalib, ayni paytda mamlakatimiz bo`ylab koronavirus infeksiyasidan butunlay sog`ayganlar 992 nafarga etdi.
