Avstraliyaning Sidney shahri yaqinidagi plyajlar tibbiy himoya niqoblariga to`lib ketdi. Ushbu niqoblar yuk kemasidagi konteynerlarning suvga tushib ketishi oqibatida plyajga yig`ilib qolgan, deb xabar beradi Daily Mail.
Ma`lumotlarga ko`ra, mazkur yuk kemasi Xitoydan Melburnga himoya niqoblarini olib kelayotgan bo`lgan. Biroq kuchli shamol va to`lqinlar ichida yuk bo`lgan 40 ta konteynerga zarar etkazib, suvga tushirib yuborgan.
Niqoblarga birinchi bo`lib karantin choralari engillashtirilgani sabab dam olish uchun okean qirg`og`iga kelgan Sidney aholisi duch kelgan. Ular bu haqda Avstraliya dengiz xavfsizligi boshqarmasi vakillariga ma`lum qilib, ijtimoiy tarmoqlarda post qoldirgan.
Plyajni niqoblardan tozalash tashabbusidan xabar topgan mahalliy aholi o`z xohishiga ko`ra, qirg`oqqa to`plangan.
«Bir soat ichida yuzlab niqoblar va ular saqlangan kichkina plastik konteynerlarni yig`dim. Bu kabi chiqindilarga paketlarim to`lib ketdi», — deydi Aliy Pott ismli ko`ngillilardan biri.
Nashrning yozishicha, yukdan ayrilgan kema kapitani ortga qaytib, Brisbenga yo`l olish bo`yicha qaror qabul qilgan.
Yuk kemasi egasining ma`lum qilishicha, suvga tushib ketgan konteynerlar ichida maishiy texnika vositalari, qurilish materiallari va turli tibbiyot buyumlari ham bo`lgan.
