Ukraina prezidenti Vladimir Zelenskiyning rafiqasi Elena Zelenskayada koronavirus aniqlandi. Bu haqda 12 iyun kuni Prezident ofisi ma`lum qildi.
Qayd etilishicha, Ukrainaning birinchi xonimining koronavirusga topshirgan testi ijobiy chiqqan. Shunga qaramay, o`zini yaxshi his qilmoqda va unda kasallik belgilari kuzatilmayapti. Ayni paytda Elena Zelenskaya boshqa oila a`zolaridan ajratilgan holda ambulatoriya sharoitida davolanmoqda.
Vladimir Zelenskiyning o`zi va farzandlari ham testdan o`tgan bo`lib, ularda virus aniqlanmagan.
Ta`kidlanishicha, birinchi xonim uyda va ishchi uchrashuvlarda Sog`liqni saqlash vazirligining karantin qoidalari va tavsiyalariga doim rioya qilgan, COVID-19’ni aniqlash bo`yicha testdan muntazam o`tib turgan. Iyun oyida o`tkazilgan test natijalari salbiy chiqqan.
U qachon va qaerda virus yuqtirib olgani hozircha noma`lum — epidemiologik tekshiruv o`tkazilmoqda. Elena Zelenskaya bilan muloqotda bo`lganlarning barchasi infeksiya xavfi haqida xabardor qilingan. Ularga ham o`zlarini izolyasiya qilish va imkon qadar testdan o`tish tavsiya qilingan.
Eslatib o`tamiz, ayni paytda Ukrainada qariyb 30 ming kishida koronavirus aniqlangan, 870 kishi kasallik asoratlaridan vafot etgan.
