Avval xabar berganimizdek, bugun o`z ishini boshlagan Oliy Majlisi Senatining beshinchi yalpi majlisida “Fuqarolarning jamoat tartibini saqlashda ishtirok etishi to`g`risida”gi O`zbekiston Respublikasi Qonuni rad etildi. Deputat Rasul Kusherbaev ayni holatga munosabat bildirdi:
"Qonun rad etilishining asoslarida bir qator kamchiliklar keltirilishiga qaramay, Senatning ushbu pozisiyasi so`nggi voqealar fonida jamoat tartibini saqlash va fuqarolar huquqlarini muxofaza qilishga mas`ul bo`lgan idoralarning harakatlariga nisbatan “salbiy” signal, deb tushunsa ham bo`ladi.
Senat raisining so`nggi vaqtlarda mas`ullarning harakatlari sabab jamoatchilik tomonidan keng muhokamalarga sabab bo`layotgan muammolarga xalq vakillarining e`tibori sustligi masalasidagi jiddiy tanqidi ham buni ko`rsatib turibdi.
Nima bo`lishidan qat`iy nazar xalq vakillari yuzlab, kerak bo`lsa minglab kishilardan iborat "armiya"ga ega qaysidir idora yoki organning tarafida emas, oddiy insonlar tarafida bo`lishi lozimligini vaqtning o`zi yana bir bor ko`rsatib turibdi. Shunda o`zaro balans bo`ladi, haqiqatga etib borish imkoniyati oshadi, bo`lmasa aksi: haqiqat “bitta”da sinadi", - deya mulohaza bildirgan deputat.
