Saudiya Arabistonida uch oylik komendantlik soati bekor qilindi. So`ng yakshanba oqshomida saudiyalik odamlar ilk bor ko`chaga erkin chiqib ovqatlanish va sayr qilish imkoniga ega bo`lishdi. Bu haqda reuters.com saytiga tayanib Tarjumon ma`lum qildi.
Qirollikda koronavirus tarqalishining oldini olish uchun mart oyida juda qattiq karantin choralari ko`rilgandi. Jumladan, ko`plab shaharlarda 24 soatlik komendantlik soati joriy qilindi va odamlarga faqat oziq-ovqat hamda dori uchungina ko`chaga chiqishga ruxsat berilgan.
Hozirgacha 157 mingdan ortiq odam koronavirus bilan kasallangan va 1267 kishi vafot etgan Saudiya Arabistonida odamlarning harakati va tadbirkorlik faoliyatiga qo`yilgan taqiqlar may oyidan engillashtirila boshlandi. 21 iyunga kelib esa komendantlik soati butunlay bekor qilindi.
“Biz komendantlik soati bekor qilinganini eshitishimiz bilanoq do`stlarimiz bilan ko`chaga chiqish haqida gaplashdik. Hayot yana qaytib keldi. Bu boshqacha tuyg`u ekan” deydi motosiklchilar guruhi a`zosi Hishom Mahros.
Ba`zi restoranlar ushbu hodisani musiqalar bilan qarshi olishdi.
“Biz yuragimizdan sevindik. Biz Riyod normal hayotga qaytganini nishonlab o`z mijozlarimiz bilan birga qo`shib kuyladik. Umid qilamizki,tez orada butun dunyoda ham hayot o`z iziga tushib ketadi” deydi Riyoddagi restoranlardan birida ofisiant bo`lib ishlovchi Ahmad Moad.
Ko`plab ishlarga ruxsat berilganiga qaramay, Qirollikda ba`zi cheklovlar saqlanib qolinadi. Xususan, 50 tadan ko`p odamning to`planishi mumkin emas, mamlakat chegaralari chet elliklar uchun yopiqligicha qoladi va umra ibodatining vaqtincha to`xtatilishi ham davom etadi.
