Andijonda singlisini himoya qilgan akaning zarbasiga dosh bera olmagan yigit uni pichoqladi. Bu haqda IIV huzuridagi Tergov departamenti xabar qildi.
Aniqlanishicha, 2020 yil 20 iyun kuni soat 10:00 da fuqaro 21 yoshli A.X., Shahrixon tumani Oq masjid ko`chasida fuqaro 18 yoshli A.B.,ga singlisi S.X., bilan gaplashmasligini aytib, urib, tan jarohati etkazgan. Shu sababli A.B., A.X.,dan o`ch olish maqsadida shu kuni soat 22:00 da A.X.,ni ushbu joyga chaqirib, yonida bo`lgan pichoq bilan A.X.,ning qorin sohasiga bir marotaba qasddan urib og`ir tan jarohati etkazgan.
Holat yuzasidan Shahrixon tumani IIB huzuridagi Tergov bo`linmasi tomonidan A.B.,ga nisbatan O`zbekiston Respublikasi Jinoyat kodeksining 104-moddasi 1-qismi (qasddan badanga og`ir shikast etkazish) bilan jinoyat ishi qo`zg`atilgan.
Hodisa joyini ko`zdan kechirish davomida A.X.,ning egnida bo`lgan futbolkasi va bir dona xo`jalik pichog`i ashyoviy dalil tariqasida rasmiylashtirib olingan.
Dastlabki tergov jarayonida, A.B., gumon qilinuvchi tariqasida jalb qilinib, unga nisbatan “qamoqqa olish” tarzidagi ehtiyot chorasi qo`llanilgan.
Tergov jarayonida A.X.,ning A.B.ga tan jarohati etkazganlik holati bo`yicha uning harakatlariga ham huquqiy baho beriladi.
Hozirda jinoyat ishi bo`yicha dastlabki tergov harakatlari olib borilmoqda.
