Internetda Shayxontohur tumanida sodir bo`lgan yo`l-transport hodisasi haqida xabarlar tarqaldi. Toshkent shahar IIBB hodisa bo`yicha quyidagilarni ma`lum qildi:
28 iyun kuni taxminan soat 20.50 da Zulfiyaxonim ko`chasida (Rayxon kafesi qarshisida) «Spark» rusumli avtomobil haydovchisi 53 yoshli T.I. yo`lni belgilanmagan joydan kesib o`tmoqchi bo`lgan piyoda 10 yoshli F.N.ni urib yuborgan (piyodalar yo`lakchasi hodisa joyidan yuz metr uzoqlikda edi).
YTH natijasida piyoda tan shikastlari bilan tibbiy muassasaga etkazildi, ammo shifokorlarning urinishlariga qaramasdan, hayotdan ko`z yumdi. Marhumning yaqinlariga chuqur ta`ziya izhor etamiz.
Ushbu fakt bo`yicha O`zbekiston Respublikasi Jinoyat kodeksining 266 moddasi ikkinchi qismi («Transport vositalari harakati yoki ulardan foydalanish xavfsizligi qoidalarini buzish bo`yicha jinoiy ish qo`zg`atildi.
Hurmatli hamshaharlar va Toshkent mehmonlari. Bu kabi holatlarning oldini olishda haydovchilarning ham, piyodalarning ham o`rinlari muhim. Yo`l harakati qoidalariga qat`iy rioya qiling. Ota-onalardan farzandlariga yo`l harakati qoidalarini tez-tez tushuntirib turishlarini so`raymiz, deyiladi xabarda.
