Qashqadaryo viloyati transport boshqarmasiga bir guruh fuqaro murojaat bilan keldi, deya xabar bermoqda Boshqarma Axborot xizmati.
Murojaatchilar karantin paytida viloyatda muayyan talablar asosida avtobusda yo`lovchi tashishga ruxsat berilgan bo`lsa-da, ammo “Damas”lar qatnoviga taqiq hamon saqlanib qolayotganiga e`tiroz bildirgan.
"O`zaro suhbatdan ma`lum bo`ldiki, kelganlarning aksari karantindan avval “Damas”da yo`lovchi tashigan. Bugun esa aytarli daromadsiz qolgan.
Ushbu murojaat yuzasidan mas`ullar tushuntirish berdi. Respublika maxsus komissiyasi qarori bilan yo`lovchi tashuvchi “Damas” va mikroavtobuslar harakatiga nisbatan vaqtinchalik cheklov chorasi qo`llanilgani, xavfsizlik, sanitariya osoyishtaligini ta`minlash nuqtai nazaridan shunday yo`l tutilgani bildirildi.
Ayni vaqtda viloyatimizning tegishli hududlarida yo`nalishsiz taksilar va avtobuslarning yo`lovchi tashish bilan shug`ullanishiga ruxsat etilgan", - deyiladi Qashqadaryo viloyati transport boshqarmasi Axborot xizmati xabarida.
