Mamlakatimiz Prezidentining joriy yil 3 iyuldagi tegishli qaroriga asosan Sog`liqni saqlash vazirining o`rinbosari lavozimiga Basitxanova Elmira Irkinovna tayinlandi. Bu haqda SSV xabar berdi.
E.Basitxanova 1958 yilda tug`ilgan. 1981 yilda Toshkent davlat tibbiyot instituti (hozirgi Toshkent tibbiyot akademiyasi)ni tamomlagan, tibbiyot fanlari doktori.
Tayinlovga qadar Toshkent shahar tez tibbiy yordam klinik shifoxonasida faoliyatini boshlagan va ko`p yillar bosh shifokor sifatida, shuningdek, O`zbekiston Respublikasi Bosh vaziri o`rinbosari, Xotin-qizlar qo`mitasi raisi, so`ng Sog`liqni saqlash vaziri o`rinbosari lavozimlarida faoliyat ko`rsatgan. Ayni paytga qadar O`zbekiston Respublikasi Mahalla va oilani qo`llab-quvvatlash vazirining birinchi o`rinbosari lavozimida faoliyat yuritib kelgan.