Toshkent viloyatining Bo`stonliq tumani so`lim manzaralari va toza havosi bilan yurtdoshlarimiz va qolaversa, horijiy sayyohlarni ham o`ziga jalb qilayotgani bor gap. Lekin Toshkent-Bo`stonliq turistik marshruti mahalliy va horijiy sayyohlarni qabul qilishga qanchalik tayyor? Dam olish kunlarida yo`nalishlardagi tirbandliklar, antisanitar dam olish “dacha”lari, sifatsiz xizmat narxlardagi “chegarasizlik”larga barham berish bo`yicha qanday ishlar qilinmoqda? 2 iyul kuni Turizmni rivojlantirish davlat qo`mitasi va bir qator davlat tashkilotlari hamkorligida tashkil qilingan press-turda ushbu savollarga javob topishga urindik.
NARXLAR NIMA UChUN QIMMAT?
Buni anglash qiyin emas. Agar taklif talabdan yuqori bo`lsa, narxlarning oshib ketishi bozor iqtisodiyoti qonunidir. Bo`stonliq tumaniga dam olish kunlari tashrif buyursangiz, hattoki jamoangiz uchun bittagina “tapchan” topish ham mushkulotga aylanadi. Sababi dam oluvchilar juda ko`p. Asosiy daromadi turizm hisoblangan tuman aholisi deyarli barcha joylarni “egallagan”. Press-tur davomida qonun-qoidalarga zid ravishda yuqori kuchlanishli elektr tarmoqlari o`tgan hududlarda ham, suv qirg`oqlarida ham “dacha”lar qurilganiga guvoh bo`ldik. Ularning bir kunlik xizmat narxlari esa 500 000 so`mdan falon ming dollargacha. Xizmat sifati esa faqat qimmat go`shalarda ta`minlangan. Qisqasi “to`la va yasha” tamoyili hukmron. Hatto ba`zi chet el mamlakatlarida dam olish xarajati Bo`stonliqqa nisbatan arzonroq ekanligi ham tajribada sinalgan.
Turizmni rivojlantirish davlat qo`mitasi raisi Aziz ABDUHAKIMOV:
"Aynan shunday holatlarga barham berish, hududda raqobat muhitini yaratish maqsadida turistik marshrut bo`ylab turli hajmdagi mehmonxonalar, turistik ob`ektlar qurilishi rejalashtirilgan. Bo`stonliqning tabiiy manzaralarini saqlagan holda sayyohlarga sifatli va hamyonbop xizmat ko`rsatish takliflari bilan murojaat qilayotgan investorlarning arizalari qanoatlantirilib, ular uchun joylar ajratilmoqda. Mahalliy xizmat ko`rsatuvchilarning narxlari juda qimmat. Hammaning ham imkoni etavermaydi. Shuning uchun ushbu mavsumdan boshlab tuman hududida mavsumiy arzon chodirlar, engil konstruksiyali dam olish inshootlari, o`tovlar o`rnatilishi boshlanadi. Ushbu ob`ektlarning narxlari ancha hamyonbop bo`lib, mahalliy xizmat ko`rsatuvchilarnikidan 5-10 baravargacha arzon bo`lishi kutilyapti. Keyingi bosqichda mehmonxonalar ham qurilib, xizmat ko`rsatish sifati yaxshilanadi va narxlar ham ancha arzonlashadi."
“Aynan Bo`stonliq tumanining shunday go`zal manzaralari bo`lgani uchun biz Fransiya, Germaniya va Turkiya davlatlari bilan fikr almashgan holda bu erda katta turistik zona qilmoqchimiz.Oddiy o`qituvchi, shifokor xodimlar bu erdagi qimmat dachalarga kela olmaydi. Biz shu tomonlarni o`ylagan holda 3-4 qavatli otellar qurishni rejalashtiryapmiz”, – deya press-tur davomida mavzuga izoh beradi Toshkent viloyati prokurori Salom Samadov.
Press-sayohatimiz mobaynida turistik marshrutdagi qilinayotgan ishlar va rejalarga bevosita guvoh bo`ldik.